DILI, STLNEWS.co – Ministeriu Saude (MS) lori tratamentu espesial ba veteranus no populasaun sira iha area remotas, hodi fo asistensia ba sira nia saude.
Lia hirak nee hatoo husi Xefi Departamentu Apoiu Koordenasaun Servisu Espesializadu iha MS, Nilton da Cruz ba jornalista iha Kaikoli, Tersa nee (18/07/2023).
Nia dehan, programa ida nee iha tinan kotuk no fulan hirak liu ba lao, hanesan mos kontinuasaun hodi fo asistensia saude neebe mak mais espesializadu ba populasaun no veteranus neebe hela iha area remotas.
Atividade ida nee rasik hetan kolaborasaun hamutuk ho Ministeriu Asuntus Kombantetes da Libertasaun Nasional (MAKLN), neebe hakarak atu lori asistensia espesializadade sekundariu ba iha veteranus sira neebe hela iha area remotas neebe asesu ba kuidadus espesializada sira.
“Atividade nee ami halo iha munisipiu barak ona, no ikus liu halo iha Munisipiu Manufahi, objetivu husi nee atu halo konsulta espesializadu neebe mak kontribui ka hetan apoiu, nomos asistensia husi espesialista sira iha HNGV nomos ekipa medika Xina, mediku espesialista neebe mak partisipa iha atividade ida nee rasik, ba iha populasaun no veteranus sira iha area rural,” dehan nia.
No iha munisipiu nee rasik mediku sira konsege deteta nomos fo atendimentu saude espesial ba iha veteranus nomos komunidade neebe hela besik iha fatin tratamentu.
(nat)
