MS Sei Hadia Sala Izolamentu

DILI, STLNEWS.co – Ministeriu Saude (MS) ba oin sei tau iha planu atu hadia sala izolamentu ba tuberkuloze iha Hospital Nasional Guido Valadares (HNGV).

Ministra Saude Elia dos Reis Amaral hatete, konaba sala tuberkuloze nee manas, MS rekonhese ida nee, tanba iha tempu naruk nia laran sala iha parte kotuk, izolamentu ba moras tuberkuloze nian ho pasiente internadu 20 resin no laos deit ba tuberkuloze, maibe ba mos sira neebe ho nutrisaun grave.

“Ba oin MS propoin atu hadia sala nee no MS planu atu harii hospital neebe kualidade diak, maibe entermus ida nee ita sei iha dezenhu no planu, no estuda didiak atu haree sasan sira nee ho diak,” dehan nia ba jornalista hafoin akompanha Rrezidente Republika vizita iha HNGV, Tersa (19/12/2023).

Nia dehan, konaba hasae kualidade HNGV nee sei halo estudu viabilidade neebe diak ho dezenhu neebe iha. Laos deit atu harii ba tinan ida ka rua, maibe oin nusa halo hospital nee sai kualidade diak.

Nia afirma, atu kualidade diak presiza iha planu adekuadu atu ba futuru mai hospital nee bele sai kualidade.

“Ita hatene katak, moras tuberkuloze nee ita laos haree ba sala, maibe oinsa kooperasaun ho pasiente ho mediku, atu nunee bele hemu aimoruk, tanba momentu sira iha tratamentu nee hemu aimoruk, durante fulan 6 nia laran,” tenik nia.

Nia dehan, pasiente sira neebe mak iha ona diagnostiku mak deteta tuberkuloze, presiza halo tratamentu tuir kriteria neebe mak parte MS fo, atu labele hakotu iha dalan klaran, se hakotu iha dalan klaran sei afeta fila-fali ba familia no komunidade sira seluk tan.

MS tau programa iha oin tolu, primeiru instituisaun funsionamentu ba iha parte institutusaun nian, depois segundu haree ba iha kuidadu saude primaria, terseiru nee haree ba sekundaria ho tersiaria.

(nat/eme)

LEAVE A REPLY

Please enter your comment!
Please enter your name here