DILI, STLNEWS.co – Servisu Saude Munisipiu Dili nafatin rejistu kazu dengue.
“Ita nia kazu hahu husi fulan Janeiru too mai horiseik, tinan ida nee ita nia kazu dengue hamutuk 1.199, entaun iha sentru saude sira ita relata nafatin, kazu mate nain 2,” lia hirak nee hatoo husi Diretora Servisu Saude Munisipiu Dili, Agustinha Segurado ba jornalista sira iha Bairu Formoza, Sesta (04/08/2023).
Nia dehan, iha deit fulan Agostu nee iha kazu dengue nain 11.
“kazu sira nee deteta barak liu iha Postu Administrativu Dom Aeixo, Krsitu Rei no Postu Administrativu Nain feto,” tenik nia.
Nia dehan, pasiente sira ho dengue agora daudaun baixa iha Sentru Saude Vera Cruz nafatin iha, no kada loron sempre iha pasiente nain tolu mak baixa iha neeba.
Nia haktuir, atuasaun saida mak halo ba dengue, tanba lixu nee sai hanesan preokupasaun boot ida, maibe Prezidente Autoridade Munisipiu Dili nian, ami komunika ba malu, para atu haree konaba lixu sira iha Dili laran.
“Depois ami nia situasaun dengue mos ami nafatin relata ba Prezidente Autoridade Dili kada semana, iha neeba ami rekomenda kedas ona, familia sira bele halo prevensaun rasik iha sira nia uma kain, ” hatete nia.
Nia haktuir, depois atuasaun ba iha fumegasaun nee mos lao tuir nafatin ba iha area sira risku nee, nafatin halo atuasaun, depois distribuisaun abate ba iha komunidade sira.
Nia salienta, iha problema oituan ba iha hena atu falun aimoruk abate, maibe hena nee sira sosa hotu ona, espera katak ekipa sira tenki halo distribuisaun, ida nee mak kategoria presiza duni kimiku abate ida nee, atu nunee bele hamate susuk tolu.
(nat)
