DILI, STLNEWS.co – Numeru dengue kontinua sae, esforsu husi Ministeriu Saude nafatin halo fomigasaun ba fatin risku sira neebe deteta ona kazu pozitivu dengue.
Ministra Saud Odete Maria Freitas Belo informa, MS nafatin halo sosializasaun, maibe kontribuisaun husi komunidade sira menus, tanba sira soe lixu arbiru nomos ladun halo limpeza iha uma ninin sira.
“Lixu soe arbiru, ema hotu laiha konsiente atu tau lixu iha nia fatin, Ministeriu Saude kontinua halo fomigasaun ba fatin neebe risku ba dengue. Maibe komunidade sira mos tenki akompanha ho limpeza iha uma sori-sorin, duut sira neebé naruk presiza hamoos, komunidade sira mos la hamós iha sira nia aredór nee susar oituan,” dehan Ministra ba jornalista, Kinta nee (27/04/2023).
Nia dehan, servisu sira nee sempre lao hamutuk, labele dependensia demais ba aimoruk sira nee, tanba aimoruk sira nee kimia bakteri, maibe dala ruma mos susuk sira nee la tauk aimoruk sira nee, entaun dalan neebe ita atu kombate dengue mak tenki limpeza iha fati-fatin, labele husik susuk tolun ba,” dehan nia.
Nia haktuir, uma laran tenki hamoos hela deit, ida mak komunidade sira tenki halo, governu mesak labele halo, se bainhira komunidade la kontribui numeru dengue kontinua sae, nia parte lakohi koalia katak komunidade sira ulun toos, maibe realidade lixu lekar iha fatin-fatin, negosiante sira mos soe lixu arbiru, ida nee fo impaktu tebes ba saude.
Nunee mos Xefi Saude Ambiental iha Ministeriu Saude, Agustinho de Oliveira informa, konaba stok abate ho malathion nee sufisiente hela.
“Neebe abate ho malathion nee sei sufisiente iha MS no iha fasilidade saude sira iha munisipiu sira, para atu halo fomigasaun ba iha kazu dengue sira neebe mak akontese,” hatete nia.
(nat)
