Pasajeirus Iha Kuarentena Tasi Tolu Fila Hotu Ba Uma

Pasajeiru 130 durante nee iha Kuarentena Tasi Tolu (KTT), fila ona ba idak-idak nia uma, tanba rezultadu amostra anunsia husi laboratorium nasional saude ho negativu, inklui mos pasiente pozitivu nain tolu husi Oecusse no nain ida iha izolamentu Vera-Cruz hamutuk nain haat rekuperadu. (Foto: STL/Jeniche da Costa)

DILI, STLNEWS.co — Pasajeiru 130 durante nee iha Kuarentena Tasi Tolu (KTT), fila ona ba idak-idak nia uma, tanba rezultadu amostra anunsia husi laboratorium nasional saude ho negativu, inklui mos pasiente pozitivu nain tolu husi Oecusse no nain ida iha izolamentu Vera-Cruz hamutuk nain haat rekuperadu.

Hatete Ministra Saude Odete Maria Freitas Belo, ba STL sira iha kuarentena Tasi Tolu, Sabadu lokraik (09/01/2021).

“Ita nia pasajeiru nain 130 neebe hela iha kuarente tasi tolu, sai hotu ona ba ida-idak nia uma, tanba rezulradu amostra negative, kuartu sira mamuk laiha ona ema mak hela iha laran,” hatete Odete.

Nia mos dehan, kondisaun kuarentena nee atu hadia kondisoens, tanba pasajeirus sira naton iha nee sira prostesa makaas dehan haris fatin jeral no kama mos ladiak, tanba nee sei hadia.

“Ami mai vizita nee atu haree took kondisoens kuarentena nian atu hadia kondisoens neebe mak iha, tanba foin lalais pasajeiru sira hela iha nee protesta dehan haris fatin ladiak, kama ladiak, tanba nee mak ami nia ekipa mai haree fila-fali los duni ka lae kondisoes ladiak duni,”nia esplika.

Odete informa katak, durante vizita ekipa indentifika iha buat balun mak ladiak, liu-liu xave haris fatin, xave odamatan kuartu inklui kuartu neebe nahe oliadu presiza troka no haris fatin presiza aumenta.

“Prontu ami identifika buat balun no presiza atu haree tau iha planu para atu hadia,” nia tenik.

Governante nee esplika, kuarentena Tasi Tolu implementa jeral tanba hahu inisiu kazu akontese iha TL haris fatin sira monta darurat, tanba nee saida mak MS atu halo mak presiza aumenta tan haris fatin.

“Ita hotu akompania iha tempu primeiru kuandu kazu akontese iha ita nia rai, ita mai nee haris fatin sira monta ona hanesan nee kedas ona, entaun saida mak ita atu halo mak ita tenke aumenta tan haris fatin, atu nunee ita organiza oinsa para tau ema ida iha kuartu ida hodi asesu ba haris fatin ida,” nia hatutan.

Odete afirma, ba futuru ekipa saude sei tau feto iha blok ida no mane blok ida nunee labele kahur malu.

“Se ita tau ema sira nee feto mane kahur malu ita tauk ema barak dala ruma bele akontese buat ruma ida nee itala espera,” nia afirma.

Iha parte seluk husi konferensia imprensa, Koordenador Pillar VII, Nilton do Carmo da Silva, relata katak, total kumilativu kazu hamutuk 49, kazu foun 0kazu rekuperadu foun ida (1) husi Izolamentu Vera-Cruz inklui RAEOA tolu (3), enkuantu atual baixa falta nain ualu (8).

“Liu husi biban ida nee hakarak deklara ba publiku tomak, katak iha loron Sabadu (09/01/20201), Ministeriu Saude fo alta tan pasiente pozitivu COVID-19 rekuperadu nain ida (1) husi sala izolamentu Vera-Cruz Dilii, inklui nain tolu (3) husi RAEOA,” Nilton dehan.

Nilton esplika ba publiku katak, pasiente pozitivu COVID-19 nain tolu (3), neebe izola iha RAEOA sira mos fila ona ba ida-idak ninia komunidade, iha loron hirak liu ba.

“Pasiente nain haat mak livre ona husi COVID-19, maibe nain 8 mak sei kontinua baixa iha sala izolamentu Vera-Cruz Dili,” nia afirma .*

Reportajen: Jeniche da Costa
Editor: Ekipa STL

LEAVE A REPLY

Please enter your comment!
Please enter your name here