DILI, STLNEWS.co – Pasiente barak liu mak halo tratamentu iha Hospital Siloam Grup, Indonezia, maioria ho moras kankru.
Diretor Nasional Servisu Apoiu Hospitalar no Emerjensia, Nilton do Carmo da Silva iha Ministeriu Saude informa, pasiente neebe transfere ba iha rai liur, iha hospital tolu, pasiente barak liu halo tratamentu iha Siloam Grup Indonezia.
“Governu TL liu husi Ministeriu Saude halo kontratu ho hospital iha Indonezia, entaun pasiente barak liu nee haruka ba iha Hospital Siloam Grup iha Indonezia, hodi halo tratamentu iha neeba,” dehan nia ba jornalista iha Kaikoli, Kinta (05/10/2023).
Nia afirma, Hospital Malazia ho Singapura pasiente ladun barak, maibe Indonezia mak barak liu.
“Neebe ita nia ema barak liu iha Indonezia, tanba hospital iha Indonezia barak, iha 5 hanesan nee. Neebe ita nia pasiente haruka ba iha neeba barak, tanba iha hospital neeba ninia ekipamentus barak,” katak nia.
Nia dehan, moras sira neebe mak barak liu haruka ba iha Indonezia nee, maioria ho moras kankru.
Aleinde nee, Mediku Espesialista Onkolojista HNGV João Teodosio Amaral haktuir, pasiente sira neebe mak halo tratamentu ba moras kankru nee tenki transfere ba iha rai liur, para hetan tratamentu.
“Sira neebe halo kemoterapia bele halo iha HNGV, maibe sira moras kankru nee, ita tenki haruka ba iha rai liur, para bele hetan tratamentu, tanba iha ema nia rai ekipamentu kompletu,” dehan nia.
(nat)
