DILI, STLNEWS.co – Pasiente neebe ho moras HIV/SIDA halao tratamentu ativu iha Klinika Bairru Pite hamutuk 200 resin, maioria afetadu ba joven sira ho idade 20 too 40 mak hetan moras HIV/SIDA nee.
“Moras HIV/Sida, sira neebe mak ativu tratamentu iha Klinika Bairru Pite nee iha 200 resin, moras HIV/SIDA neebe mak iha nee afetadu maioria joven sira neebe ho idade produtivu mak hetan moras HIV/SIDA, moras nee barak liu afeta liu ba mane, depois afera nee barak liu nee mai husi relasaun seksual,” lia hirak nee hatoo husi Diretor Klinika Bairru Pite, Inacio dos Santos ba STL iha knaar fatin, Bairru Pite, Kuarta nee (20/04/2022).
Nia dehan, moras nee mosu tanba populasaun maioria seidauk iha konhesimentu neebe mak klean konaba impaktu husi relasaun seksual, entaun ema neebe mak kumpriende konaba relasaun seksual nee minimu loos, entaun ema halo relasaun seksual neebe livre no relasaun neebe la seguru, ho nunee fo impaktu ba sira.
Aleinde nee mos Pastor Igreja Protestante iha Timor Leste (IPTL) no Xefi Klase Dili, Fransisco dos Santos informa, numeru kazu HIV/SIDA sae makaas, entaun igreja husu ba Institutu Nasional Kombate HIV/SIDA sensibiliza informasaun ba komunidade sira hodi prevene moras HIV/Sida iha Timor Leste.
Entretantu, Prezidente Institutu Nasional Kombate HIV/SIDA iha Timor Leste, Atanasio de Jesus hatete, igreja protestante sira iha inisiativa rasik, hodi husu ba Institutu Nasional Kombate HIV/SIDA fo netik esperiensia ruma konaba lalaok virus HIV/SIDA nian no sira bele fahe tutan ba komunkdade sira, liu – liu iha igreja protestante nia laran.
(nat)
