Pasiente Preokupa Aimoruk Laiha

DILI, STLNEWS.co – Oras nee daudaun pasiente preokupa aimoruk item barak neebe laiha iha Hospital Nasional Guido Valadares (HNGV), tanba pasiente tenki hola aimoruk iha klinika privadu sira.

“Ami povu hakarak mai konsulta iha hospital, maibe aimoruk laiha. Ami mai husi munisipiu tan laiha servisu, osan iha neebe, sira fo reseita ami sosa aimoruk sira nee iha klinika privadu sira,” hatete Pasiente Julia Souza Martinis husi Munisipiu Aileu ba STL iha HNGV Bidau, Kinta (15/06/2023).

Nia dehan, tristi tebes bainhira aimoruk iha HNGV balun laiha, tanba nee pasiente tenki sosa aimoruk iha klinika privadu sira. Tanba nee, husu ba governu tenki rezolve preokupasaun ida nee, tanba aimoruk laiha nee bele fo impaktu ba ema nia saude no vida.

“Ita hanoin mai iha HNGV aimoruk iha ona, maibe aimoruk barak mak laiha ita tenki sosa tan, tanba nee sei bele ita nia governu tenki rezolve problama nee, tanba ita koalia konaba aimoruk, aimoruk laiha ita bele lakon vida,” nia esplika.

Iha fatin hanesan, pasiente Maria da Costa husi Munisipiu Vikeke deklara, HNGV nudar uniku hospital neebe fo atendimentu kuidadu saude tersiariu, maibe durante halo konsulta dala barak sira hasai osan rasik sosa aimoruk iha farmasia privadu sira, tanba aimoruk laiha.

“Aimoruk neebe stok laiha ita sosa mak hanesan aimoruk insulin injeksaun ba moras diabetes, aimoruk simvastatin kolesterol nian, aimoruk vitamina B1, B6,” nia deklara.

Nia esplika, nia sofre moras diabetes, neebe tenki sona aimoruk insulin regular. Ho situasaun nee hakarak lakohi tenki buka osan atu bele sona aimoruk sira nee, tanba la sona problema boot ba nia saude.

“Ita ba sosa duni, maibe aimoruk sira nee balun folin karun hanesan simvastatin nee US$ 4 strip ida, tanba nee osan la too ida, maibe tenki sosa duni, sei la sosa ita bele mate,” nia informa.

Nunee Diretora Apoiu Servisu Diagnostika no Terapeutika iha HNGV, Mingota da Costa Herculano rekonhese, daudaun nee sira enfrenta hela problema stok out ba medikamentu item lubun ida husi lista aimoruk vital, esensial no nesesariu.

“Daudaun nee ita iha items 74 ka 18% mak stok laiha husi 405 items neebe rejista iha lista medikamentu kategoria vital, esensial no nesesariu. Husi 74 items nee 20 items husi lista vital, 37 items lista esensial no 17 items lista nesesariu,” nia koalia.

Nia tenik, bainhira pasiente sira mai, saida mak sira presiza bele provide ba, no sira bele uza duni tratamentu tuir guia neebe iha no moras neebe sira sofre, ida nee mak sira nia hakarak.

Nia hatutan, normalmente mekanizmu neebe sira foti mak halo kompras emerjensia ba items sira neebe la disponivel iha armajen sentral, liu-liu items aimoruk vital sira hanesan anesthesia, potassium chloride, maibe haree ba situasaun real neebe Timor-Leste enfrenta katak, 100% dependensia ba produtu importadu husi rai liur, mak ema ida-ida tenki halo prevensaun ba moras sira.

(nat)

LEAVE A REPLY

Please enter your comment!
Please enter your name here