Pasiente TB-DOT La Maximu

Tratamentu Directly Observed Therapy (DOT) nee efetivu atu ajuda pasiente sira kompleta tratamentu no evita resistensia ai-moruk anti tuberculosis (TB), maibe kondisaun intermus ekonomia la ajuda pasiente atu lorloron mai iha Klinika Bairro Pite (KBP) atu hemu ai-moruk durante periodu tratamentu. (Foto: Espesial)

DILI, STLNEWS.co – Tratamentu Directly Observed Therapy (DOT) nee efetivu atu ajuda pasiente sira kompleta tratamentu no evita resistensia ai-moruk anti tuberculosis (TB), maibe kondisaun intermus ekonomia la ajuda pasiente atu lorloron mai iha Klinika Bairro Pite (KBP) atu hemu ai-moruk durante periodu tratamentu.

Hatete Manager Klinika Bairro Pite (KBP), Inacio dos Santos, ba jornalista iha nia knar fatin KBP, Kuarta (03/02/2021).

Nia dehan, sidadaun barak mai husi munisipiu hela temporario iha sidade Dili, no sente moras ba halo konsulta detekta kaben tasak positivu tuberculosis submete ba programa tratamentu intensivu semana rua fila ba munisipiu konsumu aimoruk la adekuadu, tratamentu falha.

“DOT signifika lorloron pasiente tenke mai hemu aimoruk iha fasilidade saude, liu-liu iha pesoal saude sira nia oin. Labele lori ai-moruk ba uma, ita imagina fulan rua laran faze intensivu lor-loron sira hasai osan hodi sae kareta ba mai halo tratamentu entaun fo impaktu ba sira la mai hemu ai-moruk,” nia hateten.

Nia esplika, sira muda estrategia hodi distribui ai-moruk ba pasiente sira kada semana rua, maibe dala barak pasiente sira hodi ai-moruk ba uma la disiplina hemu ai-moruk no kontribui ba resistensia aimoruk tuberculosis.

Nia haktuir, pasiente positivu tuberculosis nia tratamentu pasiente tenke konsumu ai-moruk lor-loron tuir durasaun tempu minimu liu fulan nen, tanba nee presiza kria sistema tratamentu ida neebe apropriadu atu bele iha koordenasaun neebe diak liu tan entre fasilidade saude sira hodi kontrola tanba pasiente balun hela iha munisipiu.

Nia informa, iha fulan Dezembru tinan 2020, sira konsege detekta pasiente ho kaben tasak positivu hamutuk nain 112. No husi pasiente sira nee, nain 20 tenke baixa hodi hetan tratamentu intensivu iha klinika no sentru Tibar.

TB-DOT mak estrategia kontrolu neebe rekomenda husi Organizasaun Mundial Saude tanba DOT bele ajuda pasiente konklui tratamentu ho lais, redus transmisaun ba ema seluk, evita resistensia aimoruk anti tuberculosis, neebe rezulta husi tratamentu la kompletu.

Entertantu, Vice Ministru da Saude, Bonifacio Maucoli dos Reis dehan, sensibilizasaun importante tebes atu konsiensializa sidadaun hotu katak moras tuberculosis bele halo tratamentu no moras nee daet lalais, tanba nee tenke detekta lalais hodi halo tratamentu atu hakotu transmisaun.

“Ita presiza sensibilizasaun ba komunidade sira atu sira sente katak moras nee bele trata no hadaet fasil. Tanba importante ita tenke hakotu transmisaun mak ema hotu tenke konsensializa ita nia komunidade sira, karik iha maluk ruma hetan moras liu semana ida rua iha obrigasaun hakbesik aan ba fasilidade saude foti kaben tasak analiza, se positivu halo tratamentu,” nia informa.

Nia rekonhese difikuldade sira iha tratamentu, maibe sei halo esforsu atu hadia mekanismu DOT nian iha fasilidade saude sira hotu atu bele iha kontrolu neebe maximu ba tratamentu, hodi kontribui ba hapara transmisaun.

Nia informa prevalensia resistensia ai-moruk anti tuberculosis iha rai laran kiik ho 1.4%, maibe iha ona tanba nee governu sei asegura nafatin atu ai-moruk moras tuberculosis nian labele faan iha farmasia privadu sira, hodi evita kazu resistensia.*

Reportajen: Jeniche da Costa
Editor: Ekipa STL

LEAVE A REPLY

Please enter your comment!
Please enter your name here