Pasiente Tolu Mate Tanba Kankru Susun

Kordenadora programa Hau Hili Atu Kura (HALIKU), iha Organizasaun Fundasaun Alola, Pascoela Barreto hateten iha tinan 2020, pasiente kankru susun nain 3 mate tanba tamba grau avansadu. (Foto: Espesial)

DILI, STLNEWS.co – Kordenadora programa Hau Hili Atu Kura (HALIKU), iha Organizasaun Fundasaun Alola, Pascoela Barreto hateten iha tinan 2020, pasiente kankru susun nain 3 mate tanba tamba grau avansadu.

Nia dehan, pasiente kankru susun nain 3 husi nain 28 neebe sira akompanha halo tratamentu mate tanba kondisaun tama ona iha grau avansadu.

Tanba moras kankru susun bele kura, bainhira halo deteksaun sedu no tratamentu apropriado tanba nee nia enkoraja ema hotu neebe hetan ona informasaun kona ba sinais no sintomas kankru susun bele liga ba sira ou ba sentru saúde besik atu halo referral mai hospital nasional.

“Ami iha servisu diak tebes ho hospital nasional. Ami iha pesoal emergensia iha neeba, entaun pasiente sira telefone mai ami liga direta ho pesoal nee hodi hetan atendimentu. Tanba sira mai diretamente hospital ema sei la atende sira no sei husu karta referral,” hatete Kordenadora programa Hau Hili Atu Kura (HALIKU), iha Organizasaun Fundasaun Alola, Pascoela Barreto iha servisu fatin Maskarinhas, Dili, Segunda (25/01/2021).

Nia dehan, sidadaun barak mak sofre no balun mate ona tanba moras kankru, maibe atendimentu ba moras kankru iha Timor-Leste tantu diagnostika no intervensaun mediku seidauk disponivel.

Tamba durante nee sira fo apoia osan ba pasiente balun atu halo diagnostika hanesan biopsy iha rai liur liu husi hospital privado sira.

Nia hatutan, kondisaun sira nee halo pasiente sira lakon konfiansa no vontade atu halo tratamentu tanba pasiente barak mai husi area rural ho kondisaun ekonomia neebe minimu.

Nia informa, sira kontinua halo esforsu halibur fundus hodi apoia pasiente kibit laek sira halo tratamentu no nafatin halo sensibilizasaun publika ba komunidade sira kona ba prevensaun no sinais-sintomas kankru susun.

Entretantu, Xefe Departamentu moras lahadaet, iha Ministeriu da Saude, Frederico Bosco rekonhese kapasidade diagnostiku no tratamentu ba moras lahadaet, liu-liu kankru no fuan sei limitado tebes.

“Klinikamente ho buat neebe mediku sira bele hare hanesan evolusaun kanek no bubu iha susun, maibe atu konfirma ema nee sofre kankru tenke mai iha hospital nasional hodi halo diagnostiku konfirmatorio liu-liu biopsy, no dala barak iha nee laiha entau ita tenke haruka ba liur hodi konfirma.Nee mak ita nia limitasaun,” tenik nia.

Nia dehan liu husi visita Saude na Familia (SnF), profesionais saude sira mos identifika pasiente balun ho sintoma kafuak, bubu iha susun no sira halo referral mai iha hospital nasional.

Nia afirma, seidauk iha peskiza nasional ida atu bele fo sai kona ba prevalensia moras kankru iha rai laran, maibe ministeriu ho apoia husi Organizasaun Mundial Saude (OMS) estabelese ona sistema registu kankru susun iha tinan 2020.*

Reportajen: Jeniche da Costa
Editora: Carme Ximenes

LEAVE A REPLY

Please enter your comment!
Please enter your name here