DILI, STLNEWS.co – Liu husi peskiza menzies nian katak, labarik ho idade 15 mai kraik ninia imunidade hasoru moras sarampu nee kiik liu, entaun rekomenda ba Ministeriu Saude (MS) presiza halo kampanha, para hasae kobertura ba vasina rutina nee ba labarik sira.
Kestaun nee hatoo husi Peskizador Epidemiolojista iha Menzies informa, halao peskiza iha Timor laran tomak konaba sarampu rubela, Covid-19 nomos dengue, maibe husi rezultadu peskiza nee labarik sira ho idade 15 mai kraik menus tebes ba vasina sarampu rubela.
“Ami nia peskiza ba asuntu saude nian barak, agora ami halo peskiza ba sarampu rubela, Covid-19 nomos dengue, ami nia rezultadu iha Dili no munisipiu hotu, ami foin hetan potensia ba iha sarampu menus los husi labarik. Entaun ami uza dadus sira nee atu fo hatene ba Ministeriu Saude ho Organizasaun Mundial Saude (OMS) halo kampanha para atu hasae kobertura ba vasina sarampu nian,” lia hirak nee hatoo husi Epidemiolojista iha Menzies Timor Leste, Anthony Draper ba jornalista iha CCD, Tersa nee (22/11/2022).
Nia hatutan, peskiza nee halao iha munisipiu sira hotu neebe labarik sira idade husi 1 too tinan 15 ne menus tebes hetan vasina sarampu, maibe peskiza foti husi munisipiu sira nee ida neebe mak aas, entaun foti ida nee hodi fo ba Ministeriu Saude hodi halo kampanha vasina.
Peskiza ba moras sarampu, Covid-19 no dengue iha tinan 2021 too mai agora, no sei kontinua fali ba tinan oin, bainhira foti rezultadu hotu sei halo analiza, depois Menzies sei fo ba Ministeriu Saude.
Sira nia peskiza ba labarik sira ho idade 15 mai kraik nee 50% mak menus husi vasina sarampu rubela.
Iha fatin hanesan, Diretora Ezekutiva Institutu Nasional Saude (INS), Domingas Pereira informa, atu haree rezultadu peskiza neebe mak peritu sira halo durante tinan 2022 nomos husi tinan 2021.
Nia hatutan, husi peskiza nee sei aprezenta rezultadu, atu nunee oinsa intervensaun governu liu husi planu, nomos medidas neebe mak relevante, nunee bele hadia diak liu tan sistema saude neebe mak iha.
“Tinan ida nee foka liu ba sistema apoiu diagnostiku no infesaun kontrolu, tanba ita koalia konaba infesaun kontrolu barak neebe mak ita la fo atensaun,” dehan nia.
Nia akresenta, INS hanesan institutu ida neebe mak ninia kompetensia atu halo mos peskiza nomos organiza peritu sira no peskizador sira para atu halo peskiza, rezultadu nee sei rekomenda fila fali ba Ministeriu Saude atu halo planu neebe mak relevante ba peskiza neebe mak iha.
Aleinde nee mos, Ministra Saude Odete Maria Freitas Belo informa, Ministeriu Saude iha planu ida atu halo, depois halo tiha levantamentu ho asesmentu ida neebe mak liu husi Menzies informa, labarik sira ho idade 15 mai kraik ninia imunidade hasoru moras sarampu nee kiik oan tebes.
“Entaun sira propoin atu bele halo kampanha, husi peskiza no levantamentu ida nee mos sira haree labarik sira nia imunidade kik oan, tanba ita nia kobertura vasinasaun neebe kiik nee tanba ita liga ho Covid-19, entaun ita lakonsege halao ita nia atividade no programa rutina sira, tanba nee vasina rutina sira neebe mak ita la konsege atinji ita nia metas, ho ida nee mak liga kedas ho imunidade labarik sira nian,” katak nia.
Nia informa, entaun liu husi peskiza nee mak atu halo kampanha nasional ida iha Timor Leste, atu hasoru moras sarampu rubele ho polio nomos vasina PCV nian.
(nat)
