PM Taur Deklara Simu Dahuluk Vasina AstraZeneca Iha Timor Leste

DILI, STLNEWS.co – Primeiru Ministru Taur Matan Ruak deklara ona, katak nia sei sai hanesan ema primeiru iha Timor Leste hodi simu vasina AstraZeneca neebe sei hahu iha loron 7 fulan Abril tinan nee.

Kestaun nee, Ministra Saude (MS) Odete Maria Freitas Belo, informa iha seremonia simu vasinasaun AstraZeneca iha aeroporto internasional Nicolau Lobatu, Comoro, Dili, Segunda. (05/04/2021).

“Hau hakarak hatete iha nee katak, ohin iha enkontru lina minesterial konaba dezastre naturais nian, Primeiru Ministru informa ona katak nia mak sei sai hanesan ema dahuluk iha Timor Leste atu simu vasina.” dehan Odete Maria Freitas Belo.

Nia dehan, xefe governu hakarak simu vasina dahuluk, nunee hatudu ba populasaun tomak iha territoriu laran katak la iha efeitu aat husi vasina AstraZeneca nee, neebe fo sai katak iha nasaun balun hahu rezeita uza vasina nee tanba iha efeitu aat.

Ministra Saude, Odete Maria Freitas Belo ho reprezentante OMS iha Timor Leste, Dr. Arvind Mathur. (Foto: Media Palácio das Cinzas)

“Vasina ida nee seguru kualidade no efikasia, tanba nee mak ita hili vasina ida nee ba ita nia rain.” informa nia.

Aleinde nee, tuir orariu neebe Ministeriu Saude fo sai, vasinasaun iha Timor Leste sei lansa iha loron 7 fulan Abril nee, no dadaun nee Ministeriu Saude identifika ona fatin ba vasinasaun hanesan Sentru Saude sira inklui Hospital Nasional Guido Valadares (HNGV).

Vasinasaun AstraZeneca ba parte dahuluk nee sei fo prioridade liu 20% ba profisionais saude no ekipa lina frente sira, neebe durante nee servisu hodi kombate Covid-19 iha Timor Leste.

Total vasinasaun AstraZeneca neebe tula husi aviaun My Indo Airlines, too iha Aeroporto Internasional Nicolau Lobato Comoro, Dili, hamutuk dozes rihun rua nulu resin hat (24.000).

Reportajen: Alberto Menezes
Editor: Ekipa STL

LEAVE A REPLY

Please enter your comment!
Please enter your name here