PM Taur Louva Servisu Pesoal Saude

DILI, STLNEWS.co – Primeiru Ministru (PM), Taur Matan Ruak, louva esforsu pesoal saude neebe durante Covid-19 fo sira nia aan hodi servisu salva populasaun sira husi virus nee.

“Ita boot sira hatene, ema hira mak ita boot sira salva, kalan la toba, servisu la para, hodi halo teste ba ema hotu, inklui hau ho familia sira. Ita boot sira halo servisu ida neebe mak diak tebes ba ita nia nasaun, liu-liu salva ita nia populasaun sira husi moras Covid-19 dezde tinan 2020 mai too agora,” informa Xefi Governu bainhira partisipa iha serimonia lansamentu Laboratoriu no Kareta Mobile Van TB, iha Hospital Nasional Guido Valadares (HNGV), Sesta nee (05/08/2022).

Xefi Governu hatutan, iha Timor Leste ema mate ladun barak kompara ho nasaun sira seluk, tanba governu halo intervensaun lalais liu husi medida prevensaun neebe mak iha.

“Iha nasaun balun ema mate barak, no previzasaun insiu husi Ministeriu Saude ho projesaun ida ke halo ita hakfodak, maibe finalmente ita konsege reduz liu husi kapasidade neebe mak ita iha, embora ema mate kuaze 130 resin,” dehan Taur Matan Ruak.

Aleinde nee, eis Prezidente Republika nee mos fo hanoin katak, moras Covid-19 laos virus ikus neebe mundu hasoru inklui Timor Leste, tanba iha tempu oin bele mosu virus oin-oin, nunee husu pesoal saude sira atu prepara hasoru situasaun sira nee bainhira akontese.

(alb)

LEAVE A REPLY

Please enter your comment!
Please enter your name here