DILI, STLNEWS.co – Reprezentante povu iha uma fukun Parlamentu Nasional (PN) husu ba Primeiru Ministru (PM) ho Ministra Saude (MS), atu evakua emidiata funu nain loriku asuwain nain rua Simplisio ho Liurai Tasi ba halo tratamentu saude iha estranjeiru.
Tuir Deputada Bankada FRETILIN, Maria Angelica Rangel hatete, hakarak koalia konaba joven asuwain Simplisio ho Liurai Tasi hanesan mos eis deputadu iha kuarta lejislatura, sira agora iha kondisaun saude neebe mak la admiti atu halo tratamentu saude iha Timor.
“Tanba nee, ami husu Primeiru Ministru (PM) ho Ministra Saude (MS) atu pondera situasaun emerjensia ida nee, atu bele evakua ita nia funu nain loriku asuwain sira ba iha estrajeiru, hodi halo tratamentu saude,” dehan nia liu husi plenaria iha PN, Tersa nee (10/05/2022).
Nia afirma, tanba kamarada Simplisio iha tinan hirak liu ba halo operasaun ba nia ulun.
“Tanba ita hotu hatene katak, joven ida neebe Indonezia sira koa nia tilun iha Santa Cruz mak Simplisio,” tenik nia.
Nia hatutan, tanba nee husu ba PM hanesan Xefi Governu pondera lalais situasaun ida nee, bele halo evakuasaun emediata ba iha kompaneiru funu nain sira nee hodi ba halo tratamentu saude.
(dom/gui)
