PN Kestiona Rezultadu Teste Swab Tarde

DILI, STLNEWS.co – Reprezentante povu iha uma fukun Parlamentu Nasional (PN), kestiona rezultadu teste swab neebe halo iha Sentru Integradu Jestaun Krize (SIJK) fo sai tarde, tanba bele difikulta ema nia movimentu neebe ho urjensia.

Tuir Deputadu Bankada CNRT, Domingos Carvalho hatete, Sentru Integradu Jestaun Krize neebe halo swab teste ba sidadaun sira hodi bele desloka ba munisipiu sira.

“Maibe sira nia rezultadu swab hein too loron 4 ka 5, lae bele too semana 1 maka foin bele foti ita hatene katak, prazu swab nee 62 oras de tempu iha teste nee maka validu, kuandu liu ona ida nee invalidu tenke halo teste swab fali,” dehan deputadu Domingos iha PN, Kuarta (09/06/2021).

Nia dehan, se husi rezultadu swab tarde too loron 4 ka 5 maka foin bele foti oinsa, tanba ema nee foti nia rezultadu swab nee mate ka invalidu tan tiha ona, tenke ba teste ulang i depois ema nia deslokasaun nee paradu.

“Hau foti problema nee tanba, ita nia hakarak maka ba pasiar iha munisipiu ou ba lao partidu nian ruma nee buat ketak ida, maibe kuandu temi mate ema kuandu atu akompania mate nee buat urgent i teste ida nee lolos tuir swab iha dader loraik bele foti ona, tuir swab lokraik entaun dader bele foti nee, maka los,” tenik nia.

Tanba sira nia fokus nee ba loos ida halo teste swab, maibe ida nee halo demora ema foti rezultadu too loron 4 ka 5, tanba nee husu atu bele haree ba situasaun ida nee.

Aleinde nee, Deputadu Bankada FRETILIN, Antoninho Bianco katak, sente preokupa ho rezultadu teste swab neebe kleur.

“Labele ita ba halo teste swab, loron 3 maka rezultadu sai fali nee lahatene tanba saida, osan maka laiha ka material maka laiha. Ita swab teste tenke dader tama lokraik bele sai tanba deputadu mos atu halo servisu buat balun embora laos ba grupu, mais ida rua hanesan deputadu hau hetan konvite bar-barak atu ba munisipiu partisipa serimonia laos ba kazamentu, maibe serimonia ba atividade ekonomika produtivu nian populasaun husu,” dehan nia.*

Reportajen: Domingas Soares
Editora: Domingas Gomes

LEAVE A REPLY

Please enter your comment!
Please enter your name here