DILI, STLNEWS.co – Parlamentu Nasional (PN) liu husi Komisaun F neebe trata Saude preokupa ho pasiente veteranus sira neebe mak atu transferensia ba rai liur, maibe problema ho pasaporte mate.
Kestaun nee hatoo husi Sekretariu Komisaun F neebe trata asuntu Saude, Deputadu Bankada CNRT Leandro Lobato katak, hakarak koalia konaba ligadus no problema neebe mak mosu iha publiku no iha parlamentu mos koalia.
Nunee mos primeiru pasu neebe mak parlamentu mai iha Hospital Nasional Guido Valadares (HNGV), atu hetan informasaun sira klaru liga ho situasaun atual neebe mak Ministeriu Saude enfrenta no HNGV hasoru.
“Parlamentu aponta hela situasaun balun, sai hanesan kestaun publiku nian, no sai mos hanesan kestaun ba ita hotu nia, liga ho veteranus sira oras nee hasoru hela problema ida, no bele sai hanesan impedimentu ba sira, sira mai iha HNGV tanba moras, maibe atu transferensia ba iha rai liur hodi halao tratamentu iha neeba, maibe sira labele ba, tanba pasaporte mate,” dehan deputadu nee bainhira halo fiskalizasaun iha HNGV, Kinta (13/07/2023).
Nia dehan, problema ida nee sai hanesan difikuldade boot ida, hodi difikulta sira nia viajen.
“Tanba nee mak hau hakarak husu, oinsa kooperasaun entre HNGV ho Ministeriu Justisa, oinsa halo intervensaun para bele refere ita nia ema sira nee ba iha rai liur, hodi halo tratamentu,” tenik nia.
Nia espera katak, dirasaun hotu-hotu toma responsabilidade no bele fo resposta imediata ida para bele fo satisfasaun ka lamentasaun publiku nia.
Aleinde nee, Deputada Bankada Partidu Demokratiku (PD), Maria Teresa da Silva Gusmão haktuir, pasiente transferensia ba iha rai liur nee sai preokupasaun.
“Tanba nee, presiza halo instalasaun fatin kardio ho kankru nian iha ita nia rai, para bele redus transfere ita nia pasiente sira ba iha rai liur, tanba fulan-fulan ita sempre halo transferensia pasiente sira tantu veteranus no ema baibain mos ba iha rai liur,” haktuir nia.
(nat)
