DILI, STLNEWS.co – Prezidente Republika (PR), Jose Ramos Horta, rekomenda ba Governu Timor Leste (TL) tenki halo koordenasaun ho nasaun 4, hanesan Brazil, Kuba, Portugal no Indonezia, hodi harii fabrika medikamentus iha Timor.
Nia dehan, ohin mai vizita iha armajen SAMES nee nudar sidadaun ida no nudar Xefi Estadu neebe mak tenki buka no aprende, hodi rona kada ministeriu nee no akompanha deit para hatene, no prezidente nee tenki hetan konhesimentu la masimu, maibe jeral konaba sektor oin-oin neebe mak iha rai laran.
“Iha tempu badak, bainhira governu no parlamentu aprova orsamentu no promulga nee sira bele halo infraestutura foun neebe adekuadu, Timor bele halo liu tan ida nee. Hau nia rekomendasaun mak Timor tenki haree no halo kolaborasaun ho Brazil, Kuba, Portugal inklui Indonezia, hodi halo fabrika medikamentus ba ita rasik no ba merkadu iha liur. Hau temi Portugal nee para bele tau standar uniaun europeia nian, depois Brazil produtor mundial ba aimoruk ho jeneriku, depois Kuba sira fabrika medikamentu barak, para haree halo parseria diak ho sira, i uza ita nia fundus soberanu para halo investimentu duni no iha investimentu diak, laos autosufiensia 100% maibe pelumenus 30% para aimoruk ita uza nee bele halo iha rai laran,” dehan Prezidente Republika ba jornalista iha SAMES Kampu Alor, Segunda nee (01/08/2022).
Iha fatin hanesan, Visi Ministru Saude, Bonifacio Maucoli dos Reis informa, ohin Prezidente Republika, Jose Ramos Horta, foin primeira vez mai vizita iha SAMES hodi haree diretamente, liu-liu ba iha infraestutura, rekursu humanus no mos medikamentu neebe mak durante nee iha SAMES.
“Agora ninia rekomendasaun makaas mak oinsa atu hasae kapasidade rekursu no mos halo konstrusaun ba infraestutura hodi armajena medikamentus sira, depois tuir tan mak investimentu fabrika ba medikamentu,” hatete nia.
Nia dehan, nasaun Kuba prontu atu apoiu no oinsa atu lori materia iklima sira mai hodi servisu hamutuk ho SAMES nudar institutu publiku, maibe planu SAMES nian hakarak transforma ba empreza publika, entaun presiza halo negosiasaun ho nasaun sira neebe mak prontu atu ajuda.
(nat)
