DILI, STLNEWS.co – Hahu iha 2002 too mai iha 2022 nee, Pysichososial Rekuperasaun no Dezenvolvimentu iha Timor Leste (PRADET) rejistu ona ema ho defisiensia mental iha dalan ninin hamutuk 1.687.
Koordenador Programa Asistensia Moras Mental iha PRADET, Nicolau Vicente Ximenes informa, durante nee PRADET iha programa ida ba moras mental nian, neebe mak halao ninia atividade nee hahu husi tinan 2002 too mai ohin loron.
Konaba atendimentu sira nee direita ba iha komunidade sira, liu-liu komunidade sira neebe mak ho sofre moras mental.
“Tuir dadus ami rejistu husi munisipiu 7 neebe mak ami kobre, mak hanesan Munisipiu Aileu, Ainaro, Baukau, Bobonaro, Dili, Ermera no Likisa. No tinan ida nee ami mos halo tan estasaun ba ami nia atividade nee iha RAEOA. Dadus neebe mak ami nia sistema rejistu, atualizadu husi 2002 too mai iha 2022 nee, kliente neebe rejistradu hamutuk 1.687,” dehan nia ba jornalista iha edifisiu PRADET Manleuana, Dili, Kuarta (11/10/2023).
Nia afirma, husi kliente sira neebe mak iha kontinua halo atendimentu liu husi reabilitasaun pisikososial neebe atual nee sira partisipa iha nain 16. Neebe mak ativu halo rehabilitasaun pisikososial iha sentru rehabilitasaun durante loron tolu, nee hahu husi Segunda too Kuarta.
Ba kliente sira seluk nee ba iha munisipiu alvu sira neebe mak iha, PRADET halo deit vizita neebe mak tuir planu atividade PRADET nian ba tinan ida ba vizita dala rua.
(nat)
