DILI, STLNEWS.co – Pysichososial Rekuperasaun no Dezenvolvimentu iha Timor Leste (PRADET), hahu tinan 2017 too mai 2022 Dezembru nee, rejistu maluk sira neebe ho moras problema mental iha dalan ninin kapital Dili hamutuk 118 pasiente.
Kestaun nee hatoo husi Diretor PRADET, Manuel dos Santos informa, PRADET halo asintensia ba iha maluk sira ho problema saude mental nee iha distritu nomos iha Dili.
“Ami fokus liu ba kliente sira iha dalan ninin nee, neebe mak identifika iha Dili hamutuk 118 pasiente. Dadus nee hahu iha 2017 too mai 2022, pasiente sira neebe rekuperadu iha nain 23 mak halo tratamentu ho diak, maibe ami nia tekniku sira husi PRADET nia haree iha terenu, iha semana no fulan numeru sempre aumenta nafatin,” dehan nia ba jornalista iha Bidau Dili, Sesta nee (14/04/2023).
Nia hatutan, numeru ida nee kontinua aumenta, tanba maluk sira neebe mak problema ho saude mental nee kontinua mosu iha dalan ninin.
Nia hatete, PRADET mos tau matan ba iha maluk sira neebe mak ho problema saude mental iha munisipiu nee.
“Ita halo vizita kliente ba iha komunidade, no akompanha sira nia kliente familia no fo motivasaun ba iha familia intermus de akonsolamentu nomos servisu hamutuk atu haree ba medikamentu aimoruk sira neebe mak pesoal saude sira fo ba sira,” dehan nia.
Nia dehan, PRADET mos apoiu sira kuandu sira nia kondisaun rekuperadu ona, ami mos iha atividade, hanesan sira bele kuda modo, hakiak animal, kuandu sira iha skil no sira nia kondisaun nee diak ona.
Nia afirma, Organizasaun PRADET hanesan parseiru save ida ba iha ita nia governu, neebe mak halo servisu iha area sosial, saude nomos justisa, ami foku servisu ida mak area saude mental, agora daudaun nee servisu saude mental iha TL kobre husi PRADET.
(nat)
