DILI, STLNEWS.co – Ministeriu Saude (HNGV) ho Hospital Nasional Guidu Valadares (HNGV) atu aumenta tan rekursu humanus, no haruka tan mediku ho infermeiru sira foti tan espesialista ba iha psikiatria nian.
Kestaun nee haktuir husi Xefi Departamentu Psikiatria HNGV, Boaventura Jose da Costa ba jornalista iha HNGV, Segunda (28/8/2023).
Nia dehan, pasiente barak mak sei lao iha dalan ninin, entaun presiza tan rekursu humanu.
“Neebe ba oin nee ita presija aumenta rekursu humanus, neebe husu ba parte kompetente sira bele loke tan bolsu estudu, ba ita nia infermeiru ho mediku jeral sira, ba foti tan espesialista kona ba psikiatria nian,” dehan nia.
Nia haktuir, konaba atendementu iha departamentu psikiatria nian nee lao diak, maibe nafatin presiza rekursu humanus ba iha moras mental nian.
Hatan preokupasaun nee Ministra Saude Elia dos Reis Amaral informa, ba oin sei haruka tan mediku sira ba foti espesialita iha rai liur.
“Ami nia planu ba oin sei haruka tan mediku, infermeiru sira ba foti espesialista iha rai liur, tuir fazeadamente, neebe ami iha planu ona tinan ida nee ami sei loke vaga ba espesialista sira,” tenik nia.
Nia dehan, sei halo esforsu para haruka pesoal saude sira ba iha eskola tan, hodi bele atende pasiente sira iha hospital.
(nat)
