Prevene Covid-19 Tama Timor, Akademista UNDIL Apresia Servisu MS

Filipi da Silva, Xefe Peskizador Universidade Dili (UNDIL). (Foto: STL/Crisogono Magalhães)

DILI,STLNEWS.co – Governu liu husi Ministerio Saude (MS) neebe foin lalais nee fo sai ba publiku katak Timor-Leste livre hikas husi Covid-19, tanba nee husu ita hotu tenki fo apresiasaun ke boot ba iha MS.

Lia hirak nee hatoo husi Xefe Peskizador Universidade Dili (UNDIL) Filipi da Silva ba STL iha nia knaar fatin, UNDIL, Maskarenhas, Dili, Segunda (16/11/2020).

“Hau hare governi nia esforsu liu husi MS neebe halo durante nee,hodi prevene Covid-19 labele tama ita nia nasaun nee diak tebes,tanba nee ita hotu tenki apresia servisu governu nian liu-liu ita nia Ministerius Saude,” dehan nia.

Nia dehan, ita apresia ba governu liu-liu MS neebe ho sira nia esforsu tomak, mesmu ita menus fasilidade ba prevensaun nian, neebe la hanesan ho nasaun seluk, maibe ita konsege duni halo prevensaun ba Covid-19 hodi hadaet no hamate ema iha Timor.

“ita hotu-hotu orgullo, orgullo ba nai maromak, orgullo ba natureza, orgullo mos ba governu neebe liu husi MS bele hadook ona Surtu Covid-19 hodi daet mai iha Timor,” katak nia.

Nia haktuir, ba oin ita presiza halo kontrolo neebe masimu iha ita nia lina fronteira sira (fronteira terestre no maritima) ho masimu hodi nunee surtu Covid-19 labele tan atu tama iha Timor.

Iha fatin hanesan, estudante Universitariu UNDIL, Francisca da Silva hatete, apresia ho esforsu MS neebe bele kontrola ho diak sirkulasaun surtu Covid-19 iha Timor.

“Hau orgullu tebes ho servisu MS nia, hodi halo prevensaun ba iha Surtu Covid-19 neebe la konsege hamate sidadaun Timor, orgullu mos ba iha ekipa frontline husi MS, neebe durante nee halao sira nia servisu ho profesionalismu,” katak nia.

Entretantu, antes nee iha loron Sabadu (14/11/2020), governu liu husi MS, anunsia sai Timor Leste livre hikas husi Covid-19, nunee tuir dadus Covid-19 nia hahu husi fulan Marsu tinan 2020 too loron 13 Novembru 2020, total numeru teste laboratoriu too loron 13 fulan Novembru hamutuk 12.248, hein rezultadu 387, total kumulativu kazu 30, rekuperadu hamutuk 33, konta hamutuk ho ema nain 4 provavel.

Total numeru kuaretena hamutuk nain 222, iha Dili nian 179 no Munisipiu hamutuk nain 43, auto kuarentena total hamutuk nain 267, iha Dili nian 266 no munisipiu ema nain 1. Okupante kuarentena no auto kuarentena neebe pasa ona loron 14 hamutuk nain 6.017, okupante kuarentena iha Dili nian 4.966 no iha Munisipiu hamutuk nain 1.051.*

Reportajen: Crisogono Magalhães
Editor: Ekipa STL

LEAVE A REPLY

Please enter your comment!
Please enter your name here