DILI, STLNEWS.co – Moras HIV-SIDA kazu neebe seriu, governu liu husi Ministeriu Saude presiza foti medidas urjenti.
“Kazu moras HIV-SIDA nee kazu seriu, governu liu-liu Ministeriu Saude tenki hola medidas urjenti hodi asegura,” dehan Akademiku Universidade Nasional Timor Lorosae (UNTL), Felisberto de Carvalho ba STL iha nia knaar fatin edifisiu UNTL, Segunda (07/08/2023).
Nia dehan, bainhira identifika ema sira neebe ho moras HIV-SIDA tenki tau iha sentru instalasaun moras HIV-SIDA nian, hodi halo tratamentu espesifiku, nunee labele hadaet ba nia familia no komunidade.
Nia afirma, tenki halo sosializaun ba komunidade sira, atu labele halo relasaun seksual ho livre, nunee redus moras HIV-SIDA iha nasaun nee.
Nunee mos Prezidente Institutu Nasional Kombate HIV- SIDA, Atanasio de Jesus informa, parte institutu ho ONG sira nafatin fahe informasaun no halo sensibilizasaun ba iha komunidade sira.
“Atu nunee bele deteta ita nia maluk sira neebe mak kona moras HIV- SIDA, maibe sira lakohi halo tratamentu, nee ami fo hanoin ba sira para bele hakbesik aan ba iha fasilidade saude sira hodi halo tratamentu,” tenik nia.
Nia afirma, ba maluk sira neebe mak deteta tiha ona sira ho moras HIV-SIDA, maibe sira lakohi kontinua halo tratamentu, entaun parte saude ho ONG sira halo sensibilizasaun ba sira hodi kontinua tuir tratamentu.
(nat)
