Remata Kontratu, Bele Konkore Vaga

DILI, STLNEWS.co Ministeriu Saude (MS) husu ba Profisional Saude neebe mak sira nia kontratu remata iha fulan ida nee, bele konkore vaga.

Lia hirak nee hatoo husi Ministra Saude, Elia dos Reis Amaral katak, postu saude iha teritoriu nasional ameasa taka, tanba governu liu husi MS hapara kontratu ba pessoal saude sira neebe durante halo servisu iha postu saude sira.

Hatan ba kestaun nee, Ministra Saude hatete, oras nee loke hela vaga no kontinuasaun ba pesoal saude sira neebe oras nee kontratu hotu. Dalan ida mak loke vaga, neebe lao ona durante semana rua resin.

“Atu hapara ka la hapara nee kestaun ba kontratu neebe iha, no ba sira neebe kontratu remata bele konkore hikas ba vaga neebe iha, no oportunidade ida nee nakloke ba hotu-hotu, atu nunee bele kompleta no hadia jestaun rekursus umanus iha teritoriu nasional, hodi bele identifika no responde ba nesesidade populasaun sira nian,” dehan nia ba jornalista iha HNGV, Tersa (19/12/2023).

Nia haktuir, iha programa kuidadu saude primaria nee ministeriu nian objetivu mak atu hakbesik pesoal saude ba komunidade, tanba nee mak loke vaga ho numeru neebe boot, nunee hotu-hotu bele konkore.

(nat)

LEAVE A REPLY

Please enter your comment!
Please enter your name here