DILI, STLNEWS.co – Roo Barco Hospital Ship Xina halo atendimentu ba pasiente Timor oan hamutuk 10.946, durante halo ninia misaun hahu dia 3 too dia 9 fulan Setembru.
Diretor Gabinete Politika Planiamentu Operasaun Ministeriu Saude, Narciso Fernandes dehan, tuir Roo Aris Hospital Xina neebe halao ninia misaun iha TL hahu dia 3 too dia 10 ohin.
“Entaun husi dia 3 too dia 9 halo atendimentu iha Roo Hospital ba pasiente hamutuk rihun 10.946, pasiente neebe mai vizita roo hospital hodi halo tratamentu, husi numeru pasiente nee iha nain 50 mak hetan operasaun durante iha TL, iha pasiente sira neebe mak hela iha roo laran hodi halo tratamentu 2.600, pasiente sira nee hotu-hotu diak no tratamentu susesu,” dehan nia ba jornalista iha Portu Dili, Domingu (10/09/2023).
Nia afirma, misaun sira nee konta mos vizita ekipa medikus Xina ba iha Likisa neebe hetan pasiente hamutuk 300 resin, inklui vizita ba Atauro iha sentru saude neebe halo tratamentu iha neeba hamutuk 500 mak hetan atendimentu durante vizita ba neeba.
Nia tenik, maibe ohin dia 10 Roo Hospital nia misaun ikus iha TL hodi fila fali ba nasaun Xina, durante tratamentu nee iha bebe ida mos moris iha roo laran, bainhira vizita halo tratamentu no hetan atendimentu husi mediku espesialista husi roo Hospital Xina nian.
Nia haktuir, ba pasiente sira neebe hetan operasaun iha roo hospital maioria ho moras apenis, ba operasaun neebe boot sira labele konsege halo, tanba haree ba tempu neebe limitadu, entaun refere fali ba HNGV.
Nia informa, husi informasaun neebe iha posibilidade roo seluk sei mai, planu no informasaun neebe mak Ministeriu Saude simu, maibe seidauk bele fo sai.
(dom)
