DILI, STLNEWS.co – Servisu Autonomu Medikamentu no Ekipamentu Saude (SAMES) hatoo agradese ba IX Governu, tanba bele tau prioridade ba stok aimoruk iha loron 120 nia laran.
“Agradese ba IX Governu neebe foti kestaun SAMES, liu-liu liga ba stok aimoruk neebe sai prioridade ba 120 dias ninian, tanba nee ami konsidera sai hanesan prioridade, hodi halo esforsu ruma no prosesu neebe mak iha ami submete ona iha governu, liu husi Ministeriu Saude proposta adisional orsamentu US$ 6 milhoes atu bele responde ba ita nia situasaun stok out ba aimoruk no produtu seluk neebe ita presiza,” lia hirak nee hatoo husi Diretor Ezekutivu SAMES, Santana Martins ba jornalista sira iha Hotel Novu Turizmu, Kuarta (19/07/2023).
Nia dehan, orsamentu adisional US$ 6 milhoes nee iha tempu badak nia ezekusaun nee mak tenki toma atensaun, liu-liu prioridade ba asuntu aimoruk no reazente sira.
Maibe tanba situasaun nee kontribui ba siklu jestaun farmaseutikas mak sei kontribui.
“Ami nia esperansa tebes mak nee, orsamentu US$ 6 milhoes nee karik hetan konsiderasaun husi governu no Paralamentu Nasional para bele rezolve daudaun situasaun ida nee,” dehan nia.
Nia mos haktuir, depois iha loron 120 dias tau orsamentu, maibe governu mos tenki konsidera proposta neebe SAMES aprezenta iha 2024 nian tuir nesesidade neebe mak ita enfrenta hela, katak durante tempu naruk nee stock out nee sempre sai hanesan problema.
Aleinde nee, Primeiru Ministru Xanana Gusmão hatoo deklarasaun, iha setor saude governu sei kontinua implementa politika nasional saude no planu estratejiku nasional ba setor saude 2011-2030, hodi masimiza esforsu hotu atu bele garante prestasaun servisu nebee diak liu, nunee mos atu loke luan ka jeneraliza asesu ba kuidadus de saude ho kualidade, hodi haktuir didiak no beibeik konaba efisiensia, transparensia no profisionalizmo iha jestaun ba rekursu finanseiru, humanus, materiais no lojistiku, ba infraestruturas no ekipamentus.
“Liu-liu governu sei garante imediata disponibilidade ba medikamentus neebe nesesariu iha hospitais no iha sentru saude, hodi halao reforma ba jestaun no administrasaun iha setor saude, atu nunee iha futuru, direitu fundamental konaba protesaun saude ba kuidadus sira labele sai tan problema,” dehan nia.
No melhora nutrisaun infantil, no liu mos husi merenda eskolar neebe nutritiva ba labarik sira hotu.
Nia akresenta, kontinua hadia saude materna no saude infantil liu husi politikas abrangentes, neebe inklui kuidadus preventivus no integradus, hanesan iha kazu vasinasaun.
Hadia prestasaun kuidadus medikus iha Hospital Nasional Guido Valadares, iha espesialidades oin-oin, ho tan medikus no teknikus espesializadus, atu bele hahu halo tratamentu ba moras sira neebe normalmente tenki ba estranjeiru.
(nat)
