DILI, STLNEWS.co – Servisu Autonomo Medikamentu no Ekipamentu Saude (SAMES) apoiu ona oksijéniu ba iha Postu Saude Maloa.
Kestaun nee hatoo husi Diretora Servisu Saude Munisípiu Díli, Agostinha Segurado hatete, relasiona ho problema neebe Postu Saude Maloa enfrenta konaba laiha oksijeniu, daudaun nee SAMES apoia ona oksijeniu rua ba iha postu refere, nunee bele fasilita pesoal saude sira fo atendimentu ba pasiente sira neebe mai ho iis boot.
“Iha Postu Maloa la sala tuir informasaun neebe ita boot sira hatoo ona, no la sala husi SAMES atende kedas sira ho oksijeniu botir rua, no agora ita tau ona iha Maloa, espera katak ho apoiu ida nee bele mos ajuda ona ita nia maluk profisional saude sira hodi bele atua moras sira neebe bele atua iha postu saude refere,” dehan nia ba jornalista sira iha nia knaar fatin Sentru Formoza, Kuarta nee (03/05/2023).
Nia dehan, iha fasilidade saude liu-liu postu saude hotu-hotu iha espasu nomos tenki kompleta ekipamentus hanesan oksijeniu, nunee bele fasilita pesoal saude sira atu fo atendimentu ba pasiente sira.
Nia afirma, haree husi fasilidade husi postu saude hotu-hotu minimu liu iha postu saude sira neebe iha espasu nee tenki kompleta ekipamentus sira hanesan oksijeniu, para ema mai ho iis boot nee prinsipal atu suas sira. Ida nee postu saude hotu-hotu hetan, so oksijeniu la hetan maibe neubulizer nee hetan, makina ida ba suas ba labarik sira neebe ho iis boot nomos ema boot neebe mak ho iis boot.
Aleinde nee, Medika Postu Saude Maloa Verónica Barreto informa, Postu Saude Maloa neebe harii iha tinan 2010 too mai agora seidauk iha makina oksijeniu, hodi halo tratamentu ba pasiente neebe ho moras ISPA. Nunee obriga pessoal saude sira tenki transfere ba Hospital Nasional, tanba nee husu ba Ministeriu Saude atu fornese makina oksijeniu, nunee bele fasilita pesoal saude halo atendimentu lalais ba pasiente ISPA.
“Ekipamentus iha postu nee rasik sufisiente mai ami, maibe dalaruma iha kazu balun hanesan labarik sira mai ho moras ISPA no iis boot, sira presiza oksijeniu, maibe ami iha nee laiha. Ami sujere para ajuda netik oksijeniu, hodi atende komunidade sira. Karik ami la telefone ambulansia mai lalais nee fo impaktu ba pasiente sira neebe mai ho iis boot, karik ambulansia mai lalais entaun bele rejolve,” nia dehan.
Nia relata, dadus iha Janeiru too Marsu 2023, Postu Saude Maloa rejista moras neebe aas liu mak hanesan ISPA besik rihun tolu, moras kulit 547 no diarea besik 393.
(nat)
