SAMES – EDTL, E.P. Buka Solusaun Eletrisidade Iha Armajen Central

Diretor Ezekutivu SAMES, Santana Martins. (Foto: STL/Jeniche da Costa)

DILI, STLNEWS.co – Servisu Autonom Medikamentu no Ekipamentu Saude (SAMES) ho Eletrisidade de Timor Leste (EDTL, E. P.), buka solusaun ba eletrisidade iha armajen central, hodi asegura produtu vasina Covid-19, neebe sei too mai ha fulan ida nee.

Diretor Ezekutivu SAMES, Santana Martins hatete, sira instala ona cool room foun ida iha armajen central, kompostu husi espasu rua mak hanesan freezer room ho temperatura -15 celsius too -25 celsius, atu rai reajente sira ba Covid-19, no chiller room ho emperature +2 celsius too +8 celsius atu rai vasina AstraZeneca.

“Ami iha hela koordenasaun ho EDTL, EP, iha loron rua liu ba sira mai halo ona identifikasaun ba nesesidade atu sira apoia. Husi SAMES ami tau atensaun liu mak manutensaun rutina ba jerador neebe iha no halo ligasaun automatika atu ahi mate bele funsiona kedas,” hatete Santana ba jornalista sira, iha nia knaar fatin Kampung Alor Dili, Kinta (18/03/2021).

Nia dehan sei fo tan lina ida husi area sira iha Kampung Alor nian, maibe tekniku sei analiza hela tanba dupla ligasaun. Iha cool room no freezer 3, neebe rezerva hela atu rai produtu sira nee, maibe la sufisiente nafatin bainhira produtu vasina nee mai ho kuantidade neebe boot tanba nee tenke mai periodikamente hanesan mai uluk 3% ou 5% husi 20%, depois maka mai tan.

“Ita halo hela redistribuisaun freezer husi fatin balun ba fali fatin seluk neebe ita analiza populasaun nesesidade barak, entau ita lori fali jelera sira nee ba iha neeba,” nia dehan.

Nia esplika, kestaun logistika preparadu ona inklui transporte cool box atu halo transportasaun ba vasina husi armajen central ba munisipiu, neebe hetan apoia husi governu Japaun liu husi JICA, no governu mos propoin sosa taan.

Iha parte seluk, Diretora Jeral Prestasaun Servisu, iha Ministeriu da Saude, Odete da Silva Viegas dehan, enkontru Konsellu Ministru estraordinaria iha loron 8 fulan Marsu, aprova ona planu vasina no vasina 80% neebe atu sosa taan.

Nia esplika, posibilidade neebe bele akontese vasina nee iha loron 22 fulan Marsu sai husi fatin produsaun, no too iha nee loron ikus fulan Marsu atu bele hahu lansamentu iha fulan Abril, maibe depende ba iha vasina nee too mai.

“Molok atu halo vasina sosializasaun informasaun sira agora lao hela, no presiza intensifika liu tan. No kapasitasaun ba profesionais saude sira neebe atu fo vasina mos lao hela,” nia esplika.*

Reportajen: Jeniche da Costa
Editor: Ekipa STL

LEAVE A REPLY

Please enter your comment!
Please enter your name here