BAUCAU, STLNEWS.co – Servisu Saude Munisipiu Baucau hahu prepara fatin Intensive Care Unit (ICU) ba pasiente Covid-19 iha eis Hospital Tirilolo Baucau.
Lia hirak nee hato’o husi Diretor Servisu Saude Munisipiu Baucau, Domingos Reinaldo da Costa Guterres ba STL iha eis Hospital Tirilolo, Baucau, Kuarta nee (08/09/2021).
“Fatin ida nee ita prepara ba ICU Covid-19 nian, tanba ita nia kazu mos aumenta ba beibeik,” dehan diretor nee.
Nia hatutan, prepara fatin nee ba fatin ICU hodi akumula bainhira iha pasiente Covid-19 mak grave ruma tau iha fatin nee.
Fatin neebe mak prepara husi parte saude sira ba pasiente pozitivu Covid-19, bainhira grave nian mak hanesan kama neebe mak diak, oksijeniu, no ventolator ho nia monitorin sira.
Toba fatin ba pasiente pozitivu Covid-19 bainhira hetan afeita grave hamutuk kama sanulu (10), maibe posibilidade sei aumenta tan sae ba rua nulu (20), tanba iha Munisipiu Baucau kada loron kazu pozitivu Covid-19 sempre aumenta.
Fatin izolamentu antes nee iha Munisipiu Baucau hamutuk haat (4) mak hanesan fatin izolamentu Casa Cores Uatulete, eis SPK Tirilolo, Riamari, Ginaziu Baucau, dadaun nee aumenta tan ona sala izolamentu ida iha eis Hospital Tirilolo ba paseinte neebe mak afeitadu pozitivu ba Covid-19 grave nian.*
Reportajen: Tomas Reis
Editor: Ekipa STL
