DILI, STLNEWS.co – Sentru Saude Formoza kada loron rejistu pasiente neebe halo konsulta kuaze 800 resin.
“Kada loron pasiente sira neebe mak mai konsulta iha Sentru Saude Formoza, menus liu nee 150, barak liu mak 800 hanesan nee,” katak Xefi Sentru Saude Formoza, Jaime dos Reis ba jornalista iha Bairu Formoza, Kinta (31/08/2023).
Nia afirma, kada fulan Sentru Saude Formoza rejistu moras oi-oin, hanesan ISPA, kulit ho moras diarea.
Moras sira neebe mak durante nee aas iha sentru nee mak hanesan infeksaun respiratoriu agudu (ISPA), moras kulit ho moras diarea mak aas liu.
Nia haktuir, depois iha moras sira neebe lahadaet, mak moras fuan, struk, diabetes ho hipertensaun, moras sira nee mak aas iha sentru saude formoza.
Iha fatin hanesan, pasiente Maria Soares informa, ohin mai iha sentru saude nee. Tanba labarik moras isin manas ho mear nee mak lori mai, atu konsulta no simu aimoruk.
Nia dehan, agora nee tempu bain loron, rai rahun barak halo labarik sira moras hotu, laos labarik deit maibe ema boot iha hotu.
Nunee mos Diretora Servisu Saude Munisipiu Dili, Agustinha Segurado informa, moras neebe mak aas liu iha sentru saude sira iha Dili nee kuaze ISPA.
“Hau atu dehan deit katak, moras sira neebe aas liu iha sentru saude sira nee moras oin- oin, hanesan ISPA, kulit, diarea ho moras sira seluk. Neebe ita nia fasilidade sira nee nafatin fo atendementu ba sira,” tenik nia.
(nat)
