DILI, STLNEWS.co – Sentru Saude Formoza menus kadeira no kama inklui ekipamentu sira seluk neebe uza hodi halo atendimentu ba iha pasiente sira.
“Ami nia kadeira nakdoko hotu, neebe ami presiza kadeira neebe diak ba pasiente atu tur, tanba kadeira nakdoko no tohar ona. Bainhira kuandu pasiente neebe mai ho kondisaun la diak, no tur tan kadeira aat mak monu tun, nee aat liu tan. Ekipamentus seluk hanesan kama, fatin nee seidauk los no sei iha renovasaun. Fatin nee seidauk bele atu uza, maibe utiliza deit, tanba agora moras barak liu, presiza baixa. Neebe ami loke deit para atende ba pasiente,” dehan Mediku Jeral, Vitalina Vila Nova iha Sentru Saude Formoza, Kuarta nee (12/04/2023).
Nia afirma, depois ekipamentu seluk mak presiza ekipamentu tensi meter, nee presiza barak liu tan, nomos termometer mos, tanba dala ruma problema mos ho termometer.
Nunee mos Familia Pasiente Leonildo di Rego Magno informa, ohin lori labarik mai konsulta iha nee, tanba labarik isin manas derepente.
“Hau nia haree atendimentu iha emerjensia fasilidade sira nee menus oituan, maibe adekuadu, sira nafatin uza hodi atende situasaun emerjensia,” tenik nia.
(nat)
