Sentru Saude Iha Dili Difisil Aplika Distansia Fiziku

Sentru Saude sira neebe iha kapital Dili, difisil atu kumpri medida prevensaun surtu COVID-19 distansia fiziku, tanba numeru pasiente barak. (Foto: Kompas.com)

DILI, STLNEWS.co – Sentru Saude sira neebe iha kapital Dili, difisil atu kumpri medida prevensaun surtu COVID-19 distansia fiziku, tanba numeru pasiente barak.

Diretora Servisu Saude Munisipiu Dili, Agostinha Segurado hatete, sira nafatin halo esforsu atu kumpri media prevensaun hotu, hanesan ema hotu neebe visita fasilidade saude tenke uza mascara, fase liman ho bee no sabaun, antes tama iha fasilidade saúde.

“Hau hanoin ba fasilidade saude ita koalia kona ba distansia fiziku ho espasu neebe iha hau rasik konsiente katak susar oituan atu implementa, tanba nee meus neebe ami bele halo mak sensibiliza ba komunidade atu kontribui, liu-liu sira neebe urjente mai iha dader no sira neebe sei bele hein mai iha lokraik atu ita bele kumpri regras,” dehan Agostinha ba jornalista sira, iha nia servisu fatin SSMD, Kinta (14/01/2021).

Nia esplika, aplikasaun Estadu Emerjensia sira uluk iha tempu bailoron, tanba nee sira harii tenda iha liur hodi loke tan espasu, maibe agora tempu udan labele harii tenda entau espasu sai kloot liu tan.

Tanba hare ba kondisaun espasu neebe iha mak importante liu mak, ema hotu tenke uza maskara no fase liman ho bee no sabaun beibeik.

Nia informa, fasilidade saude sira hotu iha Dili laran hahu re-ativa hikas triajen, atu halo screening ba pasiente sira dahuluk antes tama ba fasilidade saude hetan tratamentu.

Entretantu, Xefe Gabinete Kontrolu Kualidade no Komunikasaun Sosial, iha Hospital Nasional Guido Valdares (HNGV), Sara Maria Freitas Xavier dehan,ospital hahu re-ativa triajen iha oin hodi bele halo screening ba pasiente hotu, neebe visita hospital antes tama ba emergensia laran hetan tratamentu.

“Ami mos limita visitor sira mai iha HNGV no pasiente ida ami autoriza familia ida deit mak hein, atu bele kumpri media protokolu prevensaun moras infesaun no labele prejudika, atendimentu profesional saude ba pasiente sira no asegura konfortabilidade, seguransa pasiente sira nian,” nia informa.

Nia dehan, familia no visitor neebe la kumpri medida prevensaun COVID-19 nian hanesan la uza maskara, la fase liman pesoal seguransa sei la fo autorizasaun atu tama ba ospital laran, hodi visita pasiente no iha hospital laran tenke mantein distansia fisiku metro ida.*

Reportajen: Jeniche da Costa
Editora: Carme Ximenes

LEAVE A REPLY

Please enter your comment!
Please enter your name here