Servisu Saude Munisipiu Dili Enfrenta Stok Aimoruk Hotu Item 33

DILI, STLNEWS.co – Servisu Saude Munisipiu Dili enfrenta stok aimoruk hotu iha sentru saude sira iha Dili laran, hamutuk 33.

“Stok hotu aimoruk iha 252 item, maibe 33 item mak stok laiha, karik kategoria ba pursentu entaun 12,6% mak stok laiha,” dehan Diretora Servisu Saude Munisipiu Dili, Agustinha Segurado ba jornalista iha knaar fatin Bairu Formoza, Kuarta (13/12/2023).

Nia dehan, husi item 33 nee ba deit iha kategoria esensial mak barak nomos nesesariu, maibe ba vital nee item 4 mak laiha.

Tuir informasaun husi responsavel husi farmasista sira katak, pedidu nee nafatin halo ba iha INFPM, atu nunee sira bele adianta. Dehan aimoruk tama ona, neebe sira sei halo kontajen, maibe sira konsidera nafatin pedidu husi saude Dili nian.

“Aimoruk vital nee paracetamol syrup mak laiha, maibe iha parcetamol tableta, entaun laos aimoruk laiha liu, maibe meus saida mak ita iha, hodi nunee nafatin garante tratamentu ba sira,” dehan nia.

Aleinde nee, Ministra Saude Elia dos Reis Amaral informa, aimoruk neebe mak stok hotu nee iha governu anterior kedas.

“Maibe agora daudaun aimoruk tama ona iha INFPM, neebe hein semana ida tan atu halo ona distribuisaun ba iha fasilidade saude sira neebe mak enfrenta stok hotu,” dehan nia.

(nat)

LEAVE A REPLY

Please enter your comment!
Please enter your name here