DILI, STLNEWS.co – Hahu Janeiru too Marsu tinan nee, Servisu Saude Munisipiu Kovalima rejistu kazu diaria hamutuk 707, husi kazu sira nee maioria labarik kiik.
“Durante fulan Janeiru too mai iha fulan Marsu tinan nee, Servisu Saude Munisipiu Kovalima rejistu kazu tee been ka diarea nee ita rejista 707, nee maioria labarik sira kiik sira mak barak,” lia hirak nee hatoo husi Diretora Servisu Saude Munisipiu Covalima, Maria de Fatima ba jornalista iha Novu Turizmu, Segunda nee (03/04/2023).
Nia hatutan, iha mos moras sira hanesan kulit nee rejistu hamutuk 95, depois iha mos moras skadies iha 68 nomos teen been ho ran iha 7.
lha biban nee, Diretora Servisu Saude Munisipiu Dili (SSM), Agostinha Segurado informa, iha Munisipiu Dili iha sentru saude 6, komesa aumenta makaas moras diarea nomos moras sira seluk.
“Ita haree relasiona udan monu rai bele halo mos impaktu ba moras liu-liu hanesan moras diarea, kabun moras, tanba nee ami husu ba komunidade sira hotu atu prevene moras diarea liu husi hahalok hanesan tenke fase liman uza sabaun bainhira prepara hahan, wainira hamos bebe nia foer depois sintina, hamos foer iha uma ninin ka bee dalan, hemu bee tasak neebe tenki nono too nakali, fase halo moos modo tahan no hahan sira neebe ita atu tein no rai hahan neebe tasak iha armariu hodi lalar labele tur iha leten, ” dehan nia.
(nat)
