DILI, STLNEWS.co – Tinan 2023 Sentru Hapara Fuma (SHF) iha Sentru Saude Formoza rejistu pasiente neebe hakarak hapara fuma hamutuk nain 325.
Responsavel Sentru Hapara Fuma Mediku Jeral, Eldino de Castro Rangel informa, hanesan baibain sira mai konsulta no atendimentu iha nee, ho inisiativa rasik mak mai iha Sentru Hapara Fuma.
Tanba nee mak baibain konsulta hapara fuma nee ho inisiativa rasik, laos tanba nia moras mak konsulta no atu simu aimoruk ba moras neebe mak iha, maibe ida nee inisiativa rasik, mai nee hakarak atu hapara fuma, neebe balun hakarak mai balun lakohi mai.
“Total pasiente neebe mai halo konsulta iha nee, iha 2023 nee hamutuk 325 pasiente mak mai halo konsulta iha nee, sira foun nee iha 194 pasiente, no sira tuan nee 131 pasiente. Sira tuan nee signifika sira neebe mai iha tinan kotuk nia mak mai nafatin no halo kontrolu fila-fali, pasiente sira nee maioria sira hapara tiha fuma ona, seidauk iha dadus neebe mak serteza, tanba pasiente balun sei iha tratamentu hela, i iha balun fuma tiha fali, maibe sira mai halo tratamentu fila-fali,” hatete nia.
Nia akresenta, pasiente neebe mak maioria rejistu iha sentru hapara fuma nee ho idade 20 too 40 mak barak, neebe maioria joven, joven sira nee fuma maioria ho kuantidade neebe mak barak liu, entaun ita presija tratamentu neebe mak efektivu ba sira no tratamentu neebe mak diak ba sira, para bele hapara fuma.
Nia dehan, pasiente sira nee iha feto nain neen no mane iha 188 pasiente mak mai halo tratamentu iha sentru hapara fuma.
Iha fatin ketak, Xefi Departamentu Moras Lahadaet, Hector da Costa perreira informa, presija estabelese Sentru Hapara Fuma (SHF) iha munisipiu sira, para populasaun sira neebe mak hakarak hapara fuma ka abandona husi tabaku.
“Estabelese tan SHF iha munisipiu sira nee ho objetivu ba ita nia maluk sira neebe mak hakarak husik ka abandona husi tabaku bele ba konsulta no bele ba simu konselin ruma, depende ba klasifikasaun ruma neebe mak pesoal saude sira iha SHF nee fo ba sira,”dehan nia.
Nia afirma, nesesidade atu estabelese nee para ita nia populasaun sira neebe mak iha konsiensia ka ho laran tomak hakarak husik hela tabaku bele hakbesik aan ba iha fatin refere, hodi bele hetan solusaun.
(nat)
