SIJK Ohin Fo Sai Pasiente Covid-19 Neebe Rekoperadu Ona

DILI ,STLNEWS.co – Sentru Integradu Jestaun Krize (SIJK), loron 17 fulan Marsu husik ona pasiente Covid-19 nain hitu (7), neebe mai husi Munisipiu Covalima, tanba pasiente sira nee rekoperadu ona.

Hatete Diretor Sentru Integradu Jestaun Krize, Brigadeiru General João Miranda “Aluc” Descartes liu husi nia deskuru iha Vera cruz Kuarta (17/03/2021).

“Ita atu fo hasai ita nia maluk sira neebe mak iha fulan kotuk liu ba, hetan pozitivu iha Munisipiu Covalima, Postu Adiministrativu Fatumea neebe mak husi Ministeriu da saude ajuda sira mai halo izolamentu, tanba hodi Nai Maromak nia tulun, ita nia rai lulik nia tulun, pasiente nain hitu nee konsege rekopera tiha ona husi moras Covid-19, neebe mak afeita ba sira nian isin,” hatete João.

Nia dehan, eforsu hotu-hotu neebe mak halo husi governu liu husi Ministeriu da Saude katak, iha duni preokupasaun no boa vontade oinsa atu fo asistensia ba pasiente sira neebe maka hasoru moras ida nee ho situasan ida nee.

“Tanba nee husi Sala Situasan SIJK atu depende ita nia maluk sira nee atu fila- fali ba sira nia moris fatin, entaun fasilita husi SIJK atu lori sira too iha sira nia hela fatin,” nia esplika.

Brigadeiru nee mos dehan, MSSI sei fo apoiu kiik ida atu fo ba pasiente neebe rekoperadu ona, hodi augenta ba loron ida ou rua ninia.

“Ita boot sira bele hodi augenta ba loron ida rua, hamutuk ho imi nia familia sira neebe mak hela iha imi nia moris fatin neeba,” nia tenik.

Liu husi oportunidade nee, nia mos husu ba povu TL tomak, atu fo konfiansa ba governu liu husi Minesteriu da Saude neebe oras nee dadaun esforsu makas.

“Atu ita bele hasoru pendemia Covid-19 ida neebe mak afeita mai iha ita nian rai, tanba nee ita hotu nia partisipasaun no esforsu neebe mak ita nia governu halo, ita bele hakat susar ida nee,“ nia afirma.

Iha fatin hanesan, pasiente rekoperadu husi Covid-19, Faustina Maria Brozes dehan, konaba fasilidade no atendementu iha izolamentu lao diak.

“Antendementu diak tebes, fasilidade mos diak, tanba dader ami matabisu, meudia han, lorokraik snack, nomos toba fatin diak,” nia esplika.

Nia dehan, pessoal saude sira mai haree sira no fo aimoruk vitamin C, depois koko tensi kada ema ida-idak.

“Ami hemu aimoruk vitamin C kada loron, nomos tes ami nia tensi, no mai swab ami tan, entaun kala teste nee negativu ona, tanba nee ami agora fila-fali ba ami nia uma,” nia hatutan.

Nunee mos Xefe Unidade Parserial e Kooperasaun iha MSSI, João Coimbra dehan, foin primeira ves MSSI fo apiu ba pasiente sira neebe rekoperadu ona, sira fo apoiu mak fos no supermi, mina, biscuit, no seluk tan.

“Ita fo apoiu ituan deit la barak ida, atu sira bele augenta hodi uza ba loron ida ou rua, molok sira lao sira nia vida normal,” nia afirma.

Nia informa, apoiu tuir fali mai sira sei haree, tanba koordenasaun diak ho SIJK, tanba nee MSSI sei haree oinsa mak bele responde tempu tuir mai, karik iha tan pasiente rekoperadu.*

Reportajen: Jeniche da Costa
Editor: Crisogono Magalhães

LEAVE A REPLY

Please enter your comment!
Please enter your name here