DILI, STLNEWS.co – Bainhira komunidade sira soe foer arbiru deit mos kontribui ona hakiak susuk barak.
“Bainhira ita soe foer arbiru nee mos hahalok neebe kontribui hodi hakiak susuk. Bainhira ita hamoos bairu laran no soe foer iha fatin lixu, nee bele hamenus susuk iha bairu laran,” dehan Observador Politika Universidade Nasional Timor Lorosae (UNTIL), Felisberto de Carvalho ba STL liu husi telefone, Kuarta (09/08/2023).
Nia dehan, mobiliza komunidade hodi hamoos bairu laran.
“Kada semana iha loron Sesta, iha kada bairu idak-idak tenki halo limpeza, no funsionariu mos halo limpeza iha sira servisu fatin, para bele prevene husi moras dengue,” tenik nia.
Nia afirma, atu prevene susuk iha tempu udan presiza limpeja jeral, iha kada bairu no aldeia.
Koordenasaun entre MS ho lideransa komunitariu sira halo limpeja jeral, no rega aimoruk susuk iha fatin neebe identifika susuk barak.
“Ita durante nee hamoos bairu laran kuandu iha programa 3 US$, maibe komunidade sira tenki iha konsiensia rasik hamoos bairu atu moris livre husi susuk,” hatete nia.
Aleinde nee, Diretora Servisu Saude Munisipiu Dili, Agustinha Segurado haktuir, atuasaun saida mak halo ba dengue nee, tanba lixu nee sai hanesan preokupasaun boot ida, maibe Prezidente Autoridade Munisipiu Dili nian, ami komunika ba malu para atu haree konaba lixu sira iha Dili laran.
“Ami nia situasaun dengue, ami nafatin relata ba Prezidente Autoridade Munisipiu Dili kada semana, iha neeba ami rekomenda kedas ona familia sira bele halo prevensaun rasik iha sira nia uma kain sira,” hatete nia.
(nat)
