SSB Falta Ekipamentus Saude Oral

Iha tinan 2011 too agora, Sentru Saude Becora (SSB), labele atende pasiente ho problema odontolojiku ka nehan, tanba falta ekipamentu saude oral. (Foto: GSE)

DILI, STLNEWS.co – Iha tinan 2011 too agora, Sentru Saude Becora (SSB), labele atende pasiente ho problema odontolojiku ka nehan, tanba falta ekipamentu saude oral.

Xefe sentru saude Becora, Adelina Pinto hatete, durante nee nia labele atende pasiente sira ho problema odontolojiku ka nehan, nune sira tenke haruka pasiente sira ba halo tratamentu iha Hospital Nasional Guido Valadares (HNGV).

“Ekipamentu oral nian ate agora ami seidauk rezolve, ami nia meza sira aat hotu, liliu ekipamentu ba fokit nian mos reazentes inklui ai moruk atu bius nehan hodi fokit nehan mos laiha, entaun saude oral nee mak sai problema ba ami, tanba husi tinan ba tinan seidauk,” hatete Xefe sentru saude Becora, Adelina Pinto ba STL, iha SSB, Dili, Segunda (30/11/2020).

Nia hatutan aleinde falta ekipamentu, laiha ai-moruk anestezia iha sentru saude Becora atu halo tratamentu ba moras nehan ka pasiente ho problema odontolojiku.

“Ekipamentu fokit nehan iha rua, maibe ida avaria desde 2011 neebe mak hau mai halo servisu iha nee no ida seluk ne mos diak, maibe kondisaun ba fokit nehan ba kazu neebe kman, kazu neebe todan, labele rezolve,” nia esplika.

Entretantu ekipamentu saude oral neebe bain bain profesional saude oral sira uza maka hanesan kadeira odontolojika, pedal komandu, meza ekipu, kompresor odontolojiku, foto polimerizador, autoklave odontolojika, X-Ray odontolojiku, jatu bikarbanotu ka kaneta ultrason no seluk tan.

Nunee mos pasiente, Arminda da Silva dehan, konaba tratamentu ba saude oral iha nee ekipamentus laiha, tanba nee sira haruka fali ba Sentru saude Formoja ou ba liu HNGV.

“Atu husu deit ba ita nia governu tenke tau ekipamentus ba saude oral iha Sentru Saude Becora, tanba ami mos presiza liu,” nia afirma.*

Reportajen: Jeniche da Costa
Editora: Carme Ximenes

LEAVE A REPLY

Please enter your comment!
Please enter your name here