DILI, STLNEWS.co – Ministeriu Saude (MS) garante aimoruk abate ho malathion sei sufisiente ba tinan ida nia laran.
“Malathion iha MS hamutuk 200 litru, nomos iha armajen SAMES stok sei iha 1,260 litru, depois abate iha MS 250 kg no iha SAMES 1,675 kg, neebe ita sei garante katak, sei sufisiente ba tinan ida nee,” lia hirak nee hatoo husi Xefi Departamentu Saude Ambiental iha Ministeriu Saude, Agustinho de Oliveira ba STL liu husi telefone, Sabadu nee (08/04/2023).
Nia hatutan, abate ho malathion nee sei garantia no sei sufisiente ba tinan ida nee nomos bele ba too iha inisiu tinan oin.
Iha munisipiu sira stok sei iha hodi bele responde ba fulan 2 nia laran, neebe konaba kimiku nee sei sufisiente hela.
“Ami mos kontinua halo sosializasaun ba iha komunidade sira oinsa prevene moras dengue, tanba dala barak komunidade sira ladun hatene informasaun konaba dengue nian. Ho ida nee ami nafatin halo promosaun saude ba ita nia komunidade sira,” dehan nia.
Nia afirma, malathion nee hodi rega mate deit susuk adultu, neebe presiza halo prevensaun nee hamoos uma laran, hikar ropa sira, nomos hamoos tanki laran sira nee para susuk evita tolu iha laran.
(nat)
