Stok Aimoruk Iha Armajen SAMES 81%

DILI, STLNEWS.co – Stok aimoruk neebe agora daudaun stok disponivel hela iha Armajen Servisu Autonomo Medikamentu no Ekipamentu Saude (SAMES), total hamutuk 81% mak stok iha hela.

“Situasaun stok iha armajen sentral SAMES, agora daudaun stok neebe mak disponivel iha SAMES nee iha 81%, stok neebe mak laiha nee iha 19% mak stok out,” dehan Diretor Ezekutivu Interinu SAMES no atual Diretor Armajenamentu no Distribuisaun iha SAMES, Octavio Fernandes informa ba jornalista sira iha SAMES Kampu Alor, Dili, Segunda (05/06/2023).

Nia dehan, husi aimoruk sira nee fahe ba kategoria tolu, kategoria vital, esensial no nesesariu, neebe aimoruk vital nee iha 85% nee stok neebe mak disponivel, stok neebe laiha nee iha 15%, vital nee ninia item 18.

Depois ba fali iha ensesial nee stok neebe mak disponivel iha 77%, depois stok out nee iha 23% total i aimoruk hamutuk 50 item.

“Maibe ami halo ona konfirmasaun ho kompanha sira neebe mak hatama aimoruk nee, para iha semana ida nee sira bele fornese ona aimoruk sira neebe mak stok out, neebe semana ida nee aimoruk tama ona para bele rejolve stok out sira neebe mak HNGV presiza, ” hatete nia.

Nia dehan, stok out item 19% nee liu-liu aimoruk sira hanesan ampixilin, nomos aimoruk espesifiku balun, neebe agora dadauk SAMES halo hela esforsu para hatama mai.

“Hau dehan tan katak, ita laos aimoruk deit maibe ita mos iha konsumaves, laboratoriu nomos ba ita nia espesialista sira, hemodialisis nomos ekipamentu mediku, radiolojia inklui oksijeniu,” tenik nia.

Nia hatutan, foin dadauk iha semana kotuk problema oituan kona ba oksijeniu, tanba fornesedor neebe mak durante nee SAMES halo kontratu ho nian nee, liu- liu Kompanhia Daiko, ninia sasan tama tarde, maibe ami halo esforsu hodi atende ba HNGV ninia nesidade liu-liu oksijeniu.

Nia salienta, agora dadauk oksijeniu lao normal ona, neebe iha fasilidade sira neebe mak halo akizasaun normal.

Kompanha Daiko nee kompania internasional neebe mak durante nee SAMES halo kontratu ho nia hodi hatama oksijeniu mai SAMES.
Alende nee Diretora Apoiu Diagnostiku no Terapiutiku iha HNGV Mingota da Costa Herculano informa, iha loron hira liuba imi halo ona intervista ho SAMES katak, agora daudaun stok out aimoruk 25%.

“Stok out iha SAMES 25% nee kategoria neebe mak makass no boot, neebe afeta tebes ba atendementu iha baze, liu-liu hanesan iha hospital, liu husi 5% nee katak, kategoria neebe mak ladiak, ladiak tanba ida nee afeta tebes ba ita nia atendementu, bainhira aimoruk ho konsumeveis laiha, entaun ita labele atende pasiente ho masimu,” dehan nia.

Nia afirma, kategoria aimoruk sira nee hanesan, vital, esensial no nesesariu, maibe aimoruk vital nee aimoruk neebe tenki iha, hakarak ka lakohi tenki iha, labele stok mamuk iha tempu neebe badak. Maibe saida mak akontese dala balun aimoruk vital laiha too semana.

Ba medikamentu nee iha kategoria vital, esensial ho nesesariu, iha fulan abril nian, 18% husi HNGV ba aimoruk neebe kategoria vital, ensensial no nesesariu, total hamutuk 405 item, maibe 74% mak stok out, aimoruk vital 20 item, esensial iha 37 item maibe nesesariu 17.

(nat)

LEAVE A REPLY

Please enter your comment!
Please enter your name here