DILI, STLNEWS.co – Xefi Sentru Saude Bekora, Adelina Pinto informa, konaba stok out aimoruk nee problema klasiku.
“Hau hanoin konaba aimoruk nee problema klasiku, neebe bainhira stok aimoruk iha SAMES mak laiha, entaun ami mos laiha, se SAMES mak aimoruk iha entaun ami mos iha,” dehan nia ba jornalista iha nia Knaar fatin Bekora, Segunda (10/07/2023).
Nia dehan, agora daudaun SAMES stok out aimoruk, entaun sentru saude sira mos stok out aimoruk hotu.
“Hau nia knaar mak oinsa halo pedidu ba iha SAMES para distribui aimoruk mai, maibe aimoruk laiha nee atu substitui fali aimoruk seluk nee infermeiru no tekniku sira mak hatene,” tenik nia.
Aleinde nee, Diretora Ezekutiva Hospital Referal Maubisi, Gabriela Magno Perreira hatete, iha hospital referal Maubisi mos iha stok out aimoruk.
“Aimoruk neebe mak stok out hospital referal Maubisi mak hanesan aimoruk norepinefrin, digoxin, propanolol, gentamycine, metochlopromide no buscopan,” katak nia.
Nia afirma, aimoruk sira nee laiha tanba iha SAMES mos laiha.
Nunee mos iha fatin hanesan, Familia Pasiente Carlos Benigno da Silva hatete, tratamentu aimoruk nee uluk iha maibe agora mak aimoruk laiha.
“Hau la hatene aimoruk nee iha ka la iha, neebe doutor sira hakerek duni hau ba hola iha fatin aimoruk nian, maibe sira dehan aimoruk nee laiha, entaun ami ba buka aimoruk sosa bazeia ba reseita neebe fo,” tenik nia.
Nia haktuir, agora mak aimoruk laiha, tanba aimoruk ba moras pulmaun nee doutor sira fo aimoruk antibiotika, no hamoos fila-fila ninia pulmaun, sira hakerek hau ba iha fatin simu aimoruk nian, maibe sira dehan aimoruk iha nee laiha.
(nat)
