DILI, STLNEWS.co – Bainhira Klinika Bairo Pite (KBP) laiha super cereal ba inan isin sira, ekipa nutrisionista halo deit akonselamentu ba pasiente sira neebe mai ho malnutrisaun ho anemia.
Informasaun nee hatoo husi Diretor Klinika Bairo Pite, Inacio dos Santos katak, konaba super cereal agora daudaun stok out iha KBP. Bainhira inan isin rua sira neebe mai, kada fulan inan isin rua sira 300 ital mak halo tratamentu iha KBP.
Nia afirma, entaun tenki halo monitorin ba sira, inklui sira nia kondisaun nutrisaun, neebe mai tama iha kategoria ho malnutrisaun ho anemia, nee fornese kedas husi super cereal, nomos suplemetu sira hanesan ferru Acid ho folic asidu para inan sira bele konsumu, maibe agora daudaun stok out ba supercerial.
“Ita espera katak iha tempu badak governu bele fornese nafatin mai klinika, para bele fornese ba iha inan isin rua sira, super cereal neebe mak stok out nee, Klinika Bairo Pite ho ekipa nutrisionista nain 4, atu fo konselhu ba inan sira, atu konsumu aihan sira neebe mak saudavel, no ai haan sira neebe iha nutritivu, no inan isin rua sira neebe mai ho anemia, iha konselhu sira para atu konsumu hahan hanesan naan sira neebe mak fresku, nomos tenki konsumu modo bayam, nutrisionista nafatin fo konselhu ba inan isin rua sira,” nia dehan.
Nia afirma, inan isin rua bainhira mai halo tratamentu mak sira hetan malnutrisaun, entaun sira refere kedas ba iha ekipa nutrisaun, para halo akonselamentu ba sira, konaba prevensaun ba malnutrisaun iha futuru.
(nat)
