DILI, STLNEWS.co – Stok vasina ba Covid-19 nian durante semana rua nia laran too iha 17 Marsu nee stock out, maibe depois de loron nee simu fali vasina Pfizer hamutuk 23.850 mil vias.
Kestaun nee hatoo husi Diretor Ezekutivu Servisu Autonomo Medikamentu no Ekipamentu Saude (SAMES), Santana Martins informa, konaba vasina Sinovac nee ninia stok sei iha hela, maibe ema atu utiliza mak ladun barak, ema prefere liu ba AstraZeneca ho Pfizer, entaun hamosu indikasaun katak, vasina Sinovac nee baradu (expired) iha loron 3 fulan April tinan ida nee.
“Tanba nee mak ami hakarak propoin fila fali ba iha Diretor Munisipal sira no fasilidade saude sira, favor ida halo pedidu mai, ba iha vasina Pfizer ninian, nunee ita bele halo ita nia distribuisaun bazeia ba iha nesesidade neebe mak sira haruka mai nee. Distribuisaun ba iha fasilidade balun lao hela, ami mos avizu ona ba grupu Ministeriu Saude para sira bele toma atensaun no hatoo pedidu mai, maibe munisipiu balun fo ona resposta, no fasilidade sira besik ita responde dadauk ona,” dehan nia ba jornalista iha Ministeriu Finansas, Tersa nee (21/03/2023).
Nia hatutan, vasina AstraZeneca bazeia ba iha politika governu ninia katak, agora nee tau liu preoridade ba iha Pfizer, entaun produtu neebe mak tama mai nee Pfizer, neebe AstraZeneca nee kuaze fulan neen ona stok laiha.
Iha fatin ketak, Xefi Sentru Saude Bekora, Adelina Pinto informa, hahu iha tinan foun nee laiha ona vasina ba Covid-19.
“Neebe ami mos la halo ona vasina, komunidade barak mai husu atu vasina ba Booster sira, maibe iha nee ami nia vasina laiha ona, entaun ami labele fo vasina,” dehan nia.
Agora nee Sentru Saude Bekora seidauk halo pedidu ba vasina nian, tanba agora nee ami fokus liu ba kampanha imunizasaun neebe mak iha, neebe ami seidauk halo ba vasina nia.
(nat)
