DILI, STLNEWS.co – Konaba Suplementu ai haan Super Cereal iha Klinika Bairo Pite sufisiente, hodi distribui ba inan isin rua no inan fo susu sira.
Kestaun nee hatoo husi Diretor Klinika Bairo Pite, Inacio dos Santos informa, malnutrisaun iha fulan Maiu kazu 11 moderadu, nain 7 grave, ita servisu ho unidade nutrisaun seguransa ai haan iha Palasiu Prezidente, sira fornese Super Cereal, entaun distribui ba inan isin rua sira.
“Supercereal sufisiente, horiseik tuir informasaun mai husi xefi departamentu nutrisaun dehan, iha stok hela oituan, entaun horiseik kedas sira halo pedidu para hetan fornesimentu suplay tuir fulan oin mai,” dehan nia ba STL iha klinika Bairo Pite, Sesta (30/06/2023).
Nia afirma, durante fulan Maiu 300 ital konsulta iha ANC nee i barak mak problema nutrisaun no anemia ho ida nee.
“Ita nia espesialista servisu hamutuk ho parteira sira atu fornese hahan neebe nutritivu liu-liu Super Cereal ba klinika Bairo Pite, hodi fo ba inan isin rua no inan fo susun sira,” tenik nia.
Aleinde nee, Koordenador Programa Nutrisaun iha Sentru Saude Vera Cruz, Antonio da Cruz informa, konaba stok Suplementu Super Cereal stok out.
“Kona ba stock Super Cereal iha Sesta semana kotuk liu ba nee stok hotu ona, agora stok laiha ona, neebe ami la distribui ona ba inan isin rua no inan fo susu sira,” dehan nia.
Nia dehan, agora suplementu nee laiha entaun labele fahe ba sira.
“Maibe ami nafatin halo promosaun no akonselamentu deit ba inan isin rua sira no inan fo susu sira, para sira bele halo tuir, atu nunee labarik sira labele hetan malnutrisaun,” katak nia.
Nunee mos Xefi Sentru Saude Komoro, Emilia Ayati de Sousa haktuir, suplementu Super Cereal ba inan isin rua neebe malnutrisaun agora daudaun laiha.
Nia informa, foin daudaun nee sira foti husi fatin seluk neebe sei iha mai ajuda iha nee, no iha nee mos agora daudaun oituan deit, ema balun hetan i ema balun la hetan.
“Super Cereal nee stok out ona, ami sempre halo pedidu ba SAMES, maibe depende ba parte relevante iha ona ka lae, kuandu stok iha ami hein deit,” tenik nia.
(nat)
