Susuk Barak, Kauza Husi Istilu Moris

DILI, STLNEWS.co – Observador Politika Universidade Nasional Timor Lorosae (UNTL), Felisberto de Carvalho hatete, susuk moris barak tanba kauza husi istilu moris komunidade nian.

“Susuk barak nee tanba kauza husi istilu moris, kuandu ita soe foer arbiru nee mos hahalok neebe kontribui hodi hakiak susuk,” dehan nia ba STL liu husi telefone, Segunda nee (24/04/2023).

Nia hatutan, tenki hamoos bairu laran, soe foer iha fatin lixu, nee atitude edukadu neebe hamenus susuk iha bairu laran.

Nia afirma, tenki mobiliza komunidade hodi hamoos bairu laran, kada semana iha Sesta feira, iha kada bairu nee tenki limpeza, inklui mos funsionariu halo limpeza iha sira servisu fatin.

Aleinde nee, Diretor Ezekutivu FONGTIL, Valentin da Costa Pinto hateten, atu muda ema nia mentalidade nee la fasil, nee duni husu entidades hotu-hotu servisu hamutuk ho Ministeriu Saude halo sosializasaun, MS halo sosializasaun mak tenki rutina, nunee bele muda komunidade sira nia mentalidade, komprensaun para sira halo prevensaun rasik.

Nia dehan, tuir lo-loos Ministeriu Saude liu husi dirasaun saidu publiku nee sira halo ona antisipasaun antes udan monu rai, halo fomigasaun iha komunidade sira nia hela fatin, ba area sira neebé konsidera risku ba dengue.

“MS mos tenki ser halo kampanha rutina, hodi besik liu ba ita nia autoridade sira para bele halo limpeza, sira nia limpeza mak la bele para, tenki kontinua nafatin,“ dehan nia.

Nia haktuir, MS servisu hamutuk ho autoridade lokal sira halo sosielizasaun hodi hasae komunidade sira nia konsiensia ba medidas prevensaun dengue, liu-liu husi kanal hot-hotu para ema hotu bele hatene, tanba kuidadu primeiru mai husi familia.

Maibe Ministeriu Saude presiza fo informasaun, para ema fo atensaun, tanba nee hanesan, sosiedade sivil husu ba governu liu-liu MS kopera hamutuk ho entidades hotu para halo kampanha rutina no labele para.

Iha parte seluk Diretur Klinika Bairu Pite Inacio dos Santos esplika, hahu husi fulan Marsu no inisiu Abril Klinika Bairu-Pete rejistu kazu dengue hamutuk 58, nain 7 pozitivu mediku sira transfer ba iha HNGV nunee nia bele halo tratamentu kontinuasaun.

“Husi dadus dengue hamutuk 58 no nain 7, ami transfer ba HNGV nee, ami husi Klinika Bairu-Pite relata ona iha vozilansia Saude Munisipál Dili, nunee sira relata fali ba iha Ministeriu Saude liu-liu ba dirasaun saude publiku iha MS, para toma atensaun ba area sira neebe deteta fatin neebé risku ba dengue,” dehan nia.

Nia dehan, fatin kuandu sira dekteta ona nee, sira komunika kedas ba iha parte sira nee, atu nunee ekipa vizilansia sira halo kedas intervensaun ba pozitivu dengue, kazu ida nee, maioria mai husi Munisipiu Dili, tanba nee Klinika Bairu Pite kontinua husu ba ekipa vizilansia sira atu kontinua tau atensaun masimu, tanba dengue nee, nia numeru nafatin sae.

(nat)

LEAVE A REPLY

Please enter your comment!
Please enter your name here