TOMAK Realiza Treinamentu Ba Nutrisaun

Espesialista Asuntu Jeneru (Gender Specialist), Cecilia da Fonseca. (Foto: STL/Tomas Reis)

BAUCAU, STLNEWS.co – NGO To’os ba Moris Di’ak (TOMAK), realiza treinamentu ba partisipante sira iha World Vision Baucau, neebe foka ba nutrisaun.

Informasaun nee hatoo husi Espesialista Asuntu Jeneru (Gender Specialist), Cecilia da Fonseca ba STL iha fatin treinamentu World Vision, Tirilolo, Sesta (05/03/2021).

Nia dehan, liu husi treinamentu fo hanoin ba to’os nain sira, oinsa foti dezisaun no utiliza rekursu neebe mak sira iha.

“To’os nain sira bele halo dezisaun ba iha uma kain nian inklui oinsa sira bele zere sira nia rekursu neebe mak iha, oinsa sira bele halo planu ba sira nia rekursu, no oinsa mak sira bele halo komunikasaun ho diak entre fen laen, para sira bele utiliza sira nia rekursu nee ho diak,” dehan Cecilia.

Nia hatutan, komunidade sira tenke komsumu aihan neebe mak nutrisaun diak husi to’os rasik, maibe labele uza pratika lori ba merkadu faan tiha no depois sosa fila fali supermie no ale-ale neebe mak laiha nutrisaun diak. Tenke utiliza duni aihan neebe mak diak, produs rasik atu responde duni ba nesesidade loron-loron ho nutrisaun duni.

Tanba nee atu fa’an aihan produtivu sira nee tenke iha planu, wainhira fa’an tenke han uluk lai mak fa’an, depois fa’an balun karik bele sosa fila fali material ou halo luan tan kantareiru.

“Sira bele ba fa’an haboot tan kantareiru ga to’os nee, maibe tenke han uluk depois mak ba faan, fan para investe fali ba ekipamentu agrikultura ga investe fali ba labarik eskola ga ou hola fali han sira neebe mak nutritivu, neebe mak sira lahetan iha sira nia to’os hanesan ikan ga manu tolun ga buat sira seluk,” katak Cecilia.

Cecilia afirma, komunidade sira tenke hakbesik aan liu ba programa World Vision, atu nunee bele hatene liu tan oinsa mak bele konsumu aihan neebe mak nutritivu husi to’os laran, atu nunee bele responde nesesidade nutritivu.

Nia husu ba komunidade sira neebe mak iha Timor laran tomak, karik osan iha labele ba hola ayam potong no supermie, tanba bele estraga fali saude, maibe diak liu konsumu mak aihan neebe kuda rasik atu nunee bele saudavel nafatin.*

Reportajen: ESTTO.V
Editora: Carme Ximenes

LEAVE A REPLY

Please enter your comment!
Please enter your name here