UNFPA Apoiu MS Fasilita Formasaun Ba Fasilitador

DILI, STLNEWS.co – United Nations Population Fund (UNFPA) apoiu Ministeriu Saude (MS) hodi fasilita formasaun ba fasilitador sira, hodi atende kazu violensia bazeia ba jeneru (VBJ) iha fasilidade saude sira.

Lia hirak nee hatoo husi Analista Programa Violensia Bazeia ba Jeneru iha UNFPA, Dercio Francisco Xavier Ximenes katak, programa UNFPA sai parseiru importante husi MS.

“Ami apoiu MS para atu haforsa kapasidade setor saude nian, atu responde ba kazu bazeia ba jeneiru, UNFPA fo ona apoiu barak, intermus de kapasitasaun pesoal saude sira no estabelesimentu ba infraestutura sira, ho nesesariu para responde ba kazu violensia bazeia jeneru,” dehan nia ba jornalista sira iha salaun ETDA Fatuhada, Segunda (12/02/2024).

Nia afirma, ohin mos ajenda importante ida tan, tanba konsege integra duni sistema kolesaun ba iha dadus nomos sistema saude, ho ida nee nafatin apoiu MS hodi responde ba iha kazu bazeia ba jeneru.

“Hau hanoin atividade nee hanesan projetu ida husi doasaun, depois ami halo kooperasaun diak ho MS. Formasaun ida nee hanesan formasaun ba iha fasilitador sira nain 20, bainhira sira hetan tiha formasaun no iha tiha konhesimentu mak sira sei kontinua fali ba munisipiu sira,” dehan nia.

Nia mos afirma, atu nunee pesoal saude sira iha nivel munisipiu iha mos kapasidade hodi rekolha dadus sira, depois relata fali mai iha nivel nasional.

Iha fatin hanesan, Diretor Nasional Apoiu Kuidadu Saude Primaria no Familiar iha Ministeriu Saude, Noel Gama Soares hatete, ohin loron ekipa teknika husi MS, nee husi programa violensia bazeia ba jeneru husi MS nia, hamutuk ho parseiru dezenvolvimentu sira, liu-liu UNFPA ho OMS.

Halo formasaun ida konaba sistema informasaun saude, liu-liu indikadores ba iha violensia bazeia ba jeneru.

“Tanba nee mak ohin loron ami hamutuk iha loron rua nia laran, hahu ohin no aban sei diskuti indikador importante sira neebe mak sei hamosu iha sistema informasaun saude MS nia,” dehan nia.

Nia salienta, atu nunee apoiu MS, kuandu iha ona informasaun neebe mak diak, para aban bain rua foti desizaun kontretu ba iha problema neebe iha.

Nia akresenta, depois formasaun ida nee mos sei kontinua fahe formasaun ba profisional saude sira neebe mak servisu iha baze, para sira bele hatene katak, indikadores importante neebe iha MS, liu-liu ba iha programa violensia bazeia ba jeneru, atu nunee informasaun sira nee bele rekolha husi fasilidade saude sira.

Nia hatete, formasaun ida nee daudaun sei ba ekipa teknika parte MS nian, tanba sei prepara lai indikadores sira iha nee no sei haree diak, no sei evalua fali indikadores sira nee, neebe semana ida ka rua tan nee sei kontinua fahe formasaun ida nee ba profisional saude sira iha munisipiu 13 inklui RAEOA.

(nat)

LEAVE A REPLY

Please enter your comment!
Please enter your name here