DILI, STLNEWS.co – Ligadu ho kazu insidente tuda malu neebe komete husi militantes partidu politiku sira, iha Aldeia Dacuate, Suku Afaloikai, Postu Admnistrativu Uatulari, Munisipiu Vikeke, rezulta ema nain 16 hetan kanek no uma 7 hetan estragus.
Portavos Komando Jeral Polisia Nasional Timor Leste (PNTL), Superintendente Xefe Polisia Arnaldo Araujo hatoo kestaun nee ba jornalista sira liu husi konferensia imprensa neebe realiza iha salaun Komjer Kaikoli, Dili, Sesta nee (28/04/2023).
Nia dehan, iha dia 27 Abril 2023 ema hotu hatene, ema hotu haree, viral iha media sosial liu-liu iha area Vikeke, akontese militantes partidu balun tuda malu. Depois de militantes sira husi partidu balun fila husi fatin kampanha, iha Afaloikai, Aldeia Dacuate, Suku Afaloikai Postu Admnistrativu Uatulari, Munisipiu Vikeke.
Nia konta, problema nee akontese bainhira militantes sira fila mai too iha dalan klaran, sira hetan tuda husi komunidade balun, depois rezulta ema balun kanek, no problema nee hetan kedas atuasaun husi PNTL Munisipiu Vikeke nian.
“Ema neebe mak sai vitima nee hamutuk ema nain 16, tuir relatoriu neebe mak mai husi Vikeke, maibe laiha fatal, vitima sira daudaun nee idak-idak iha ona uma,” dehan nia.
Depois ida nee, militantes balun hakarak ba hasoru PNTL Postu Uatulari, sira husu atu bele rezolve fali problema nee, entaun iha neeba sira obriga PNTL sira hakarak halo buat nee urjente, maibe ita nia PNTL sira ho profesionalizmu hetan apoiu husi F-FDTL sira, ho nunee komunidade sira konsege fila fali ho diak, tanba PNTL nia atuasaun diak.
Iha momentu akontesimentu nee mos PNTL too kedas iha fatin akontesimentu hodi asegura kedas fatin neeba, no ema sira neebe mak sai vitima nee lori tiha ba iha fatin neebe mak kurtivu ba.
Tanba nee, PNTL kontinua buka tuir ema sira neebe maka involve iha akontesimentu insidente nee. No PNTL sei buka tuir tan informasaun atu nunee bele hatene lolos se mak involve iha insidente nee.
“Sim loos, rejulta uma 7 mak hetan estragus nee loos, maibe ita hotu hein katak iha tempu badak, PNTL sei bele haree se maka involve iha neeba,” dehan nia.
Tanba iha momentu neeba ema barak tebes, nunee PNTL labele konsege ida por ida, tanba nee iha tempu badak PNTL uza maneira oinsa mak bele identifika ba ema sira neebe involve.
Nia rekonhese katak, iha parte Munisipiu Vikeke nian sempre akontese beibeik kazu insidente sira nunee, maibe fila fali ba idak-idak nia konsiensia, no PNTL husu ba militantes sira atu resepeita regras kampanha nian.
Iha parte ketak, Xefi Suku Afaloikai, Costantino Guterres hatete, bainhira atu ba partisipa kampanha Partidu FRETILIN nian iha Suku Vesoru, militante FRETILIN harahun uma 7 iha Suku Afaloikai.
Nia dehan, iha oras tuku 10:00 dader militante FRETILIN sira iha kareta laran neebe atu ba partisipa Kampanha FRETILIN iha Suku Vesoru, sira tun tuda uma militante CNRT nian. Iha akontesimentu nee F-FDTL tuun direita ba terenu hodi hakalma situasaun.
“Uma 7 iha Suku Afaloikai mak hetan estragus, uma 3 husi Aldeia Dacu Ate no 4 seluk husi Aldeia Osso Qaiwa,” dehan Xefi Suku Afaloikai Costantino Guterres.
Xefi Suku Afaloikai haktuir, iha akontesimentu nee uma nain sira la iha uma laran. Tuir informasaun neebe iha, militante FRETILIN obriga hatun tiha bandeira CNRT, uma nain sira laiha uma laran, nunee sira tun ba tuda uma sira neebe dada bandeira iha uma oin.
(efi)
