DILI, STLNEWS.co – Polisia Nasional Timor-Leste (PNTL) liu husi Eskuadra PNTL Dom-Aleixo, asegura joven mane nain 1 ho inisial ENPB alias N, tanba envolve iha kazu burla, iha Aldeia Avansa, Suku Bairo Pite, Postu-Administrativu Dom Aleixo, Munisipiu Dili.
Iha Sesta kalan, Ekipa Konjunta liu husi Eskuadra PNTL Dom-Aleixo no Servisu Informasaun Polisia Makikit konsege lori suspeitu ENPB, hamutuk ho vitima ida neebe halo keixa ba kedas halo identifikasaun, tanba deskonfia suspeitu envolve kazu burla agravadu ka bosok vitima Claudino Baptista tinan 32, hodi hetan lukru.
“Iha loron 3 Junhu, tuku 4 lokraik, nia mai foti kareta atu sosa no nia husu atu koko uluk lai se diak mak fo osan, maibe nia ba gadai fali ba maun ida naran Abel iha Bidau. Bainhira nia ba gadai, maun Abel presiza kartaun eleitoral atu cocokan ho kareta, entaun nia mai husu tutan hau nia eleitoral atu lori ba nia patraun, maibe nia lori ba fo fali maun Abel”, dehan vitima Claudino neebe STL asesu husi Media Officer Ministeriu Interior, Segunda nee, iha Esquadra PNTL Dom-Aleixo Komoro, Dili, Sesta (23/06/2023).
Claudino dehan, durante nee nia hein promesa nee, maibé la sai realidade, ho nunee vitma sira ba hatoo keixa ba PNTL, hodi buka tuir suspeitu sira no konsege halo aprensaun iha Sesta kalan.
“Hau telefone nia semana ida tomak la foti, entaun hau telefone fali ba PNTL, ami ba nia uma deit hodi husu tuir no nia dehan gadai ona ba ema. Kontaktu ba maun Abel dehan atu foti kareta tenki lori osan US$ 5000.00, entaun nia mak tenki selu osan ida nee”, dehan nia.
Tuir vitima, kareta nee hetan lelaun husi Timor Lodge ho osan US$ 16.000, entaun nia hadia fali monta kedas plat A. 27657 hafoin faan fali ho presu US$ 17.000.
Iha biban nee, suspeitu ENPB deklara, nia prontu atu devolve fali osan hirak nee hodi bele foti fali kareta iha neebe oras nee daudaun para hela iha Bidau.
“Buat neebe nia koalia nee los hotu, nia telefone lapara rai, nee maka hau la simu, maibe hau prontu selu fali osan sira nee sebelum tanggal 3 Julhu,” dehan suspeitu nee.
Nia hateten, agora daudaun nia fo uluk ona osan US$ 1000.00 ba nia, entaun nia tenki fo fali mai para falta tan US$ 4000.00, nee nia buka para selu ba Abel hodi foti fali kareta nee,” hakotu suspeitu nee.
(efi)
