METINARU, STLNEWS.co – Ministeriu Defeza entrega Sentru Kombustivel ba FALINTIL Forsa Defeza Timor Leste (F-FDTL), iha Metinaru.
Serimonia entrega Projetu Sentru Kombustivel nee realija iha Metinaru Dili, Sesta (30/06/2023).
Iha diskursu reprejentante Ministru Defeza, Diretor Jeral Admnistrasaun Pedro Lemos hateten, konstrusaun Sentru Kombustivel ida nee hanesan planu prioriedade Ministeriu Defeza nian, bazeia ba diretiva, Planeamentu ministerial nian iha 2018 i 2023.
Objetivu atu apoiu servisu operasional no asegura misaun FALINTIL FDTL, iha area Defeza no Seguransa Nasional.
“Ho mina ida nee bele tulun ona F-FDTL hodi fortifika liu tan sira nia servisu no proporsional iha area defeza,” dehan nia.
Nia dehan, planu konstrusaun Sentru Kombustivel F-FDTL nee hahu ho nia estudu viabilidade no dezenhu iha tinan 2019 i 2020, iha fulan Novembru 2021 mak hahu prosesu konstrusaun no finalija iha tinan 2022, lo-loos entrega tiha ona iha neeba.
Tanba nee, husi fulan Janeiru too Junhu 2023, finaliza prosesu inklui lisensa ambiental, lisensa operasional, formasaun no rekejitus neebe importante ba funsionamentu estasaun mina.
“Mina ida nee sei la utiliza ba atividade komersial, maibe utiliza deit hodi apoiu distribuisaun kombustivel ba Kuartel Jeral, Komponente, Postu, Unidade F-FDTL, iha teritoriu Timor Leste tomak,” dehan nia.
Nia hateten, Sentru Kombustivel ida nee sei jere no supervijona husi Komando F-FDTL, hodi kumpri tuir nia regras no regulamentu neebe difini ona .
“Tanba nee, ohin ita hamutuk iha nee hodi asisti inaugurasaun nomos hand over, Sentru Kombustivel ida nee ba Komando F-FDTL hodi bele hahu sira nia operasaun,” dehan nia.
Nia hatutan, ho atividade hirak nee hotu lori Ministeriu Defeza nia naran hatoo agradese wain ba parte hotu-hotu neebe kontribui ba prosesu ida nee.
Iha biban nee, reprejentante Xefi Estadu Maior das FALINTIL Forsa Defeza Timor Leste (F-FDTL), Tenente Jeneral Domingos Raul Falur Rate Laek, Brigadeiru Jeneral Joao Miranda Aluc, lori Forsa Armada tomak nia naran hatoo agradese wain ba esforsu neebe mak Ministeriu Defeza halo, hodi estabele sentru fornesimentu ida nee ba iha forsa Armada.
Nia mos hatoo agradese ba empreza Aitula, maski iha item balun inklui ba iha pakote neebe mak atu estabelese ba iha sentru de Abastesimentu ida nee menus, maibe sira konsege aranja hodi fasilita Forsa Armada.
Nia dehan, Sentru Abastesimentu ida nee bele dehan katak, bele fasilita Forsa Armada sira, liu-liu iha nia movimentasaun a nivel de unidade hotu neebe mak kompoen Forsa Armada.
“Tanba ita hatene katak, se ita bele iha sentru ida neebe mak ita nian rasik, tuir difikuldade, enkuantu mais, ita tama ba iha situasaun difisil ida. Tanba nee mak iha nesesidade Ministeriu Defeza halo esforsu ida neebe hodi estabelese Sentru Abastesimentu ida nee ba Forsa Armada,” dehan nia.
Tanba nee, dala ida tan agradese ba Ministeriu Defeza, hanesan ba iha empreza Aitula. Ba Forsa armada ida nee nian tenki buka halo nusa no oinsa atu asegura, no oinsa atu halo nia jestaun i hanesan mos ninia manutensaun.
Tanba empreza nee entrega ba iha Ministeriu Defeza, hodi entrega tiha ona mai iha Forsa Armada, nee Forsa Armada nia responsabilidade, tanba iha ona forsa nia liman. Nee dunik Sentru Abastesimentu ida nee besik liu iha Sentru Formasaun i Terenu, hanesan mos Komponente Apoiu Servisu (CAS).
“Fiar katak ita sei asegura ho masimu ba ita nia Sentru Abastesimentu ida nee, so ho ida nee mak ita bele fasilita ita nia vida, ita nia atividade, ita nia asoens, ita nia parasoens, ita nia ezersisiu, neebe mak ita halo iha tempu oin mai,” hakotu Aluc.
Nunee mos reprezentante Diretora Kompanhia Aitula, Project Maneger, Silverio Ferreira Mau Bere hateten, Kompanhia Aitula agradese ba Ministeriu Defeza neebe mak fo fiar ba Aitula hanesan kontrator no ohin bele realiza serimonia simples ida nee.
“Halo inaugurasaun ba Postu Abastesimentu F F-FDTL Metinaru,” dehan nia.
Nia dehan, durante implementasaun ba Konstrusaun Postu Abastesimentu, kompanhia hetan difikuldade balun, maibe kompanhia nafatin kolabora ho Ministeriu Defeza nia teknika sira, nomos Obras Publika no ADN. Ekipamente kompanhia ho Ministeriu Defeza ho instituisaun relavantes sira seluk mak sempre buka solusaun neebe ho kualidade no diak.
Tanba nee, iha item balun kompanhia oferese gratuita, balun orsamentu neebe preve iha biokiu, tanba nee nudar Timor oan, nudar sentidu timorizasaun, kompanhia ho fuan boot entrega ba F-FDTL.
“Tuir lo-loos ita nia serimonia nee iha tinan kotuk, administrativamente entaun iha falha, prontu ita iha mudansa oituan, kompleta rekejitus neebe mak AMPM husu, laos Kompanhia Aitula nian, mais kompanhia nafatin inisia buka dalan nafatin atu kompleta buat kiik oan sira neebe AMPM sira husu,” dehan nia.
Tuir nia, tanba hetan difikuldade sira temi iha leten nee, tan nee ohin data 30 Junhu 2023, ida nee mak halo simbolikamente serimonia para bele kooperasaun iha tempu badak.
(efi)
