Deskonfia Sidadaun Indonezia Tiru Timor Oan

DILI, STLNEWS.co – Deskonfia ema deskonhesidu husi nasaun vizinhu Indonezia, utiliza kilat anin tiru kanek sidadaun Timor oan ida, bainhira ba haree karau iha toos, iha Aldeia Belulik Kraik, Suku Belulik Leten, Postu Administrativu Fatumea, Munisipiu Kovalima.

Komandante Jeral Polisia Nasional Timor Leste (PNTL), Komisariu Jeral Polisia Henrique da Costa hateten, Komando PNTL simu ona relatoriu konaba kazu sidadaun Timor oan ida hetan tiru husi ema deskonhesidu balun, deskonfia husi nasaun vizinhu Indonezia.

“Iha loron 30 fulan Maiu, ita hetan duni relatoriu ida husi Komandante PNTL Munisipiu Kovalima, konaba sidadaun Kovalima oan ida husi Postu Administrativu Fatumea, bainhira iha toos haree karau mak hetan tiru ho kilat anin,” dehan Henrique ba jornalista sira iha salaun Kuartel Jeral PNTL, Kaikoli, Dili, Kinta (01/06/2023).

Nia dehan, ema deskonhesidu neebe utiliza kilat anin tiru kanek sidadaun nee, deskonfia sira husi nasaun Indonezia, tanba nee komando fo ona orientasaun ba iha Unidade Patrolhamentu Fronteira (UPF), ho Komandante PNTL Munisipiu Kovalima atu halo movimentu iha linha fronteira terestres, hodi kontinua halo investigasaun ba kazu nee.

“Kazu ema utiliza kilat anin tiru kanek sidadaun nee, ita deskonfia sira husi nasaun Indonezia, tanba nee ita fo ona orientasaun ba iha UPF, ho Komandante PNTL Munisipiu Kovalima, atu halo movimentu iha linha fronteira terestres, hodi kontinua halo investigasaun ba kazu nee,” dehan nia.

Nia hateten, situasaun daudaun nee iha Munisipiu Kovalima lao diak, tanba nee efetivu membru PNTL kontinua halo operasaun patrolhamentu hodi asegura seguransa iha linha Fronteira Terestres, tanba area ida luan, depois sidadaun sira rai rua neebe vizinhu iha Froteira, sira sempre ba mai halo fetosan no umane.

Tanba nee, Komando PNTL rasik komunika ona ho ofisial ligasaun husi nasaun Indenezia POLRI iha Timor-Leste, hodi informa ba autoridade seguransa Indonezia neebe destakadu iha fronteira, hodi haree asuntu nee, buka tuir suspeitu sira hodi hatan ba aktu neebe sira komete.

“Ligadu ho kazu nee, komunika ona ho ofisial ligasaun husi nasaun Indonezia, POLRI iha Timor-Leste, para sira bele hatene hodi informa ba iha autoridade seguransa Indonezia iha Fronteira bele haree asuntu nee hodi buka tuir suspeitu sira,” hakotu nia.

(efi)

LEAVE A REPLY

Please enter your comment!
Please enter your name here